Modernized-PUVs moabot sunod bulan

GATUSAN sa mga public utility vehicle driver ug operator ang matabangan na ning tuiga sa ilang pagpa-modernize sa ilang mga pampublikong sakyanan sa sunod tuig ug hingpit na makasunod sa programa sa gobyerno ang Public Utility Vehicle Modernization Progam (PUVMP).

Kini human nga 300 na sa mga miyembro sa transport cooperative division sa Cebu People’s Multi-purpose Coop (CMPC) ang ni-avail.

Gani sa sunod buwan o sa Hunyo, gikatakda nga moabot na ang inisyal nga 15 ka units sa bus, ang moabot dinhi sa Sugbo, sa 200 nga ilang tinguha nga i-purchase.

Hinuon gitug-an ni Macario Quevedo, chief executive officer sa CPMC ug Atty. Gary Maningo sa Transport Service Coop, nga nag-agad nalang sila sa desisyon sa Land Transportation Franchising and Regulatory Board (LTFRB) alang na sa paghatag sa maong prangkisa ug kon asa ang mga rota.

Niadtong 2017, gilusad sa Department of Transportation ang Public Utility Vehicle Modernization Program, diin ang mga jeep ug bus nga 15 ka tuig ug pataas na ang dili na padaganon, alang sa seguridad sa mga pasahero ug sa uban pa.

Gitinguhang mapatuman sa hingpit ang programa sa sunod tuig, diin di na bag-uhon ang mga prangkisa kansang sakyanan wa masunod sa PUVMP nga lagda.

Ubos sa PUVMP, dili na hatagan og prangkisa ang single-proprietorship, kundi kinahanglang mag-umol og transport service corporation o cooperative.

Nisud ang CPMC, sukad Disyembre 2018 hangtud karon, 300 operators sa libuan nila ka sakop nga ni-avail. (FMD)