GIPILO og katulo ang pagka ‘anomaloso’ sa budget sa koleksyon sa basura sa administrasyon ni Mayor Tomas Osmeña Osmeña.
Kini ang paghulagway ni Konsehal Joel Garganera, kinsa nisumbalik ngadto ni Osmeña may labot sa unang pamahayag sa mayor dihang si kanhi mayor Michae Rama pa ang mayor.
“Makita nato during 2015 and 2016, the mayor accusing the former mayor Mike Rama that the garbage budget he appropriated for it’s disposal was anomalous and matod pa niya mao ni source sa corruption. And our budget was 157 million,” padayag ni Garganera.
Matod sa konsehal, gi-triple na ang budget sa 2019 diin ang siyudad nitagana og P590.5 milyones.
Sa 2017, si Osmeña nigasto og P405 milyones pinaagi sa supplemental budget bisan P231.1 milyones ra ang naapil sa annual budget.
Sa 2018, ang siyudad ni-approved og P459.6 milyones alang sa tibuok tuig apan, nahimong P509.6 milyones gumikan sa pagpalabang og SB.
Ang maong mga detalye maoy gihuptan ni Garganera kansang record gikan sa City Accounting Office.
Iyang gihulagway nga sa panahon ni Rama sa hinapos sa 2015 ug sayong bahin sa tuig 2016, limpyo ang siyudad gikan sa nagpasad ug nagtipun-og nga basura bisan gamayng budget itandi sa kasamtangang administrasyon.
“Are we satisfied and contented with our garbage service, nga nag-anam og kamahal nag-anam man ta og kahugaw? Iya man tong gihulagway nga anomaloso to sauna, karon sobra paman ni sa times three.." dugang ni Garganera.
Ang Superbalita Cebu nisuway og tawag ug text ni Osmeña apan atol ning pagsuwat way nadawat nga tubag ning mantalaan.
NAUSAB ANG SET-UP
Apan gidepensahan ni Engr. John Paul Gelasqu, pangulo sa Department of Public Services (DPS)nga nidako ang budget sa siyudad para sa basura sanglit nausab ang sistema sa paglabay sa hugaw.
Iyang giangkon nga nidako ang gasto sa Cebu City sanglit wala mosunod si Osmeña sa sistema ni Rama nga gihulagway sa mayor nga anomaluso ug illegal sanglit wala moagi sa konseho ang paglabay direkta sa Cebu City ngadto sa private landfill sa Consolacion.
“Tinuod na siya nga nidako and its not an issue nga nidako ang (budget), nidako siya tungod sa system nga nausab kay wa nata nideretso sa Polog,” padayag ni Gelasque.
Iya sang giasoy nga ang P590 milyones alang sa 2019 mao ang one time big time nga pundo sanglit ang dakong pahat niini gipalit og 21 ka garbage compactor truck.
Ang gipasabot ni Gelasque mao ang pag-hire og private hauler diin nagbayad ang City Government og tag P700 gikan sa barangay paingon sa transfer station ug laing dul-an P1,300 matag tonelada gikan sa transfer station paingon sa landfill.
Si Gelasque niingon nga limpyo ang siyudad gikan alas 7 sa buntag hangtod als 4 sa hapon ug kon adunay wala makolekta naa kini sa interior sa mga barangay.
Ang pangulo sa DPS niingon nga dili si Garganera ang mohulagway kon limpyo o hugaw ang dakbayan.
“As to the question kon mas limpyo ba karon or dili, let the people decide dili siya kay politically motivated man kon siya mo-estorya. Ang mga tawo maoy pasultia," dugang sa hepe sa DPS.
Apan si Garganera niingon nga dili angay pilion sa DPS ang oras nga limpyo sama sa 7am-4 pm sanglit ang City Government nagbayad og P700/hour sud sa 24 oras sa hauler diin iyang gihulagway nga dehado ang gobyerno niini. (PAC)