Unsay motibo sa pagpatay?

CEBU. Ang negosyanteng magtiayon nga gipusil-patay sa duha ka mga lalake nga nakamotorsiklo sa dakbayan sa Mandaue. (Tampo nga hulagway)
CEBU. Ang negosyanteng magtiayon nga gipusil-patay sa duha ka mga lalake nga nakamotorsiklo sa dakbayan sa Mandaue. (Tampo nga hulagway)

NEGUSYANTENG magtiayon nga nagmotorsiklo ang gipusil-patay sa duha ka mga lalaki nga nakamotorsiklo nga gituohang mga tulisan.

Kini bisan kon angkas sa magtiayon ang ilang 9-anyos nga anak nga babaye pasado alas 11 sa gabii sa Dominggo, Abril 14.

Usa sa mga bag sa mga biktima ang gikawat sa gunman hinungdan nga nagtuo ang kapulisan nga tulis ang motibo.

Apan ang duha giingon sa hepe sa Mandaue City Police Office (MCPO) nga nalakip sa ilang drug watchlist.

Ang pagpamusil nakuha pa sa usa sa mga close circuit television (CCTV) camera nga gimontar sa Mandaue City.

Ang mga biktima nga giilang sila si Michael, 27, ug Fraldine Kate Ramayla Canes, 24, taga Purok Lemonsito, Barangay Umapad, Dakbayan sa Mandaue, nangamatay diha-diha.



Sa kuha sa CCTV footage, si Michael ang nagmaneho sa motorsiklo, angkas ang asawa nga si Fraldine, ug ilang anak.

Nitupad

Nihunong sila sa may dan A. C Cortes, corner SB Cabahug Street, sa Barangay Ibabao, Mandaue City, sa dihang stop ang signal. Samtang sila nagpaabot nga mo-go signal, gituparan sila sa duha ka lalake nga nagmotorsiklo.

Ang angkas nipusil og una kang Michael, dayon nikanaug sa motorsiklo ug nipusil kang Fraldine.

Gikuha sa gunman ang itom nga sling bag sa asawa dayon og pusil og balik kang Fraldine.

Matod ni Police Major Aldrin Villacampa, hepe sa Centro Police Station, nga ang bata giingon nga nagpapatay-patay aron di apilon pagpusil.

Sa inisyal nga pakisusi, matod ni Villacampa, nga posibleng sa balay pa sa magtiayon sila gisunod-sunoran.

Mga silingan nakamatikud na og mga lalake nga nakatap-tap ang nawong.

Ang magtiayon adunay negosyo nga ready-to wear (RTW) nga overruns sud sa usa ka mall sa Mandaue City.

Niadtong Dominggo sa gabii, giingon nga gikan ang mga biktima sa North Bus Terminal naghatud og mga RTW alang sa isla sa Bantayan.Padulong na unta sila mopauli.

Usa sa gitan-aw nga motibo sa pagpamusil mao ang murder-robbery, diin ilang gisusi kon may kalambigitan ba kini sa ilang negusyo.

Ila usab gisusi kon may labot ang kremin sa pagkasikop kaniadto sa amahan ni Michael tungod sa ginadili nga drugas.

“Murder-robbery ato gitan-aw ani, kay sa CCTV, iya man gipusil ang asawa kay murag nilugnot pa pagkuha sa bag,” asoy ni Villacampa sa Superbalita Cebu.

drugas na sab?

Apan, matod ni Police Colonel Julian Entoma, director sa MCPO, nga ang magtiayon anaa sa ilang drug watchlist.

Giingon niya nga na-link kini sa drug queen, Joy Encila, kinsa nasikop niadtong Marso 3 sa lungsod sa Consolacion.

“We are now investigating deeper the case as the theory of Stn 1 investigator that the motive is robbery. However, both victims are included in our drugs watch list and link with the Joy Encila drug group with alyas Boss for Michael and aka Madam for Fraldane. Hence the motive is not just robbery but murder and the killers robbed the victims after shooting them as they got the bag containing money of the victims. No identified suspects yet,” text ni Entoma sa Superbalita Cebu.

Apan usa ka tinubdan nga di gustong nganlan nisulti sa Sunstar Cebu nga wa malambigit sa drugas ang magtiayon. Yano lang sila nga mga negusyante.

Matod sa tinubdan nga nasagmuyo ang pamilya sa mga biktima nga diretso lang gilambigit ang magtiayon sa illegal drugs.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph