NAKUHAAN og video ang usa ka bata nga gibunalan og tuwalya samtang nagsinggit og pangalan sa politiko atol sa gipahigayon nga handshaking sa Barangay Dayawan, lungsod sa Villanueva, Misamis Oriental, niadtong adlawng Biyernes, Abril 12.
Makita sa maong video nga nagsige og singgit ang bata sa pangalan ni Benjo Benaldo.
Si Benaldo magpapili pagka kongresista sa Misamis Oriental ubos sa partido sa PaDayon Pilipino.
Pag-abot ni Benaldo sa Barangay Dayawan nag-una ang mga bata sa pagsinggit sa iyang pangalan niini apan usa ka babayi nga naka kolor green og t-shirt nga adunay tatak Team Unity sa likod ang mibunal og towel sa bata hinungdan sa pagkaigo sa nawong niini ug gibawi pa ang mga leaflets nga gidala sa bata.
Si Benaldo nga nainterbyu sa Sun.Star Superbalita ug laing sakop sa prensa atol sa ilang proclamation rally sa lungsod sa Villanueva, niadtong adlawng Domingo sa gabii, Abril 14, niingon nga dili maayo nga apil-apilon ang mga bata sa ingon ani.
“Ang ilang style dinhi panghulga, walay respeto sa dignidad sa usa ka tawo which is complete opposite sa kinaiya sa amo sa Partido PaDayon Pilipino kay equal tang tanan, walay sapian, walay pobre, di kinahanglan manakit. Ako lang is respect everyone,” matud ni Benaldo ug miingon nga dili mapugngan ang mga bata kung kinsay pangalan ilang isinggit.
Dugang ni Benaldo nga unta matutoon sa ilang lider kining ilang mga tawo nga dili moasta og ingon niini tungod kay sa gihimo niini makawala kini og confidence sa usa ka bata nga makita sa video nga nakaangkon ug sama sa naulawan.
Ang pamilya sa bata dili pa makadesisyon kon manumbong sa misalaba sa bata tungod kay dili na ganahan og gubot.