ALERTO ang kapulisan sa Misamis Oriental Provincial Police Office (Moppo) sa pagsugod sa obserbasyon sa Semana Santa sa tibuok lalawigan.
Si Police Senior Inspector Princess Joy Enriquez, tigpamababa sa Moppo niingon nga sa Huwebes Santo magsugod na sa pag-deploy ang kapulisan sa mga nag-unang pilgrimage site sa probinsya.
Lakip sa ilang gitutukan ang Sipaka Heights sa Talisayan ug Devine Mercy Shrine sa dakbayan sa El Salvador ug ang site sa Flight 387 sa lungsod sa Claveria, Misamis Oriental, mga simbahan ug mga beach resort.
Taliwala dili ingon ana kadaghan ang pwersa sa kapulisan ilang gipaniguro nga ma-maximize kini ngadto nagkalain-laing mga lugar.
Tungod kay full alert ang kapulisan gidid-an ang mga personahe nga magpahigayon og leave ug kinahanglan naka-duty kini labina nga gimonitor sab nila ang paglihok sa mga walhong grupo nga posibleng mangatake sa mga police station.
“Intact atong mga personnel kay naka-full alert ug kasya pod sa mga deployment. Wala sab tay threat ug ang mga NPA ato pod silang ginabantayan,” matud ni Enriquez.
Lakip sa ilang katambayayong sa pagbantay sa lugar mao kining kasundalohan, Bureau of Fire Protection ug Provincial Risk Reduction Management Office.
Nanawagan si Enriquez sa katawhan nga sa dili pa molakaw sa tagsa-tagsa ka mga balay sigurohon nga nakakandado ang mga pultahan ug sigurohon nga na-ibot ang mga nakapansak nga mga kabtangan.
Ingon man alang niadtong mga mosaka sa mga pilgrimage site magdala kanunay og tubig, payong aron nga dili ma-heat stroke ug ingon man dili ma-dehydrate.