60 anyos nabanggaan, patay

NAGBUY-OD ug naligo sa iyang kaugalingong dugo ang usa ka heavy equipment operator human nabanggaan sa naghaguros nga motorsiklo sa lungsod sa Tagoloan, Misamis Oriental, niadtong mga alas 11:45 Sabado sa gabii, Abril 13.

Patay si Dominador Entig, lumad sa Negros Occidental, kinsa kasamtangang nagpuyo sa Sta. Cruz, Tagoloan ug nagtrabaho isip operator sa heavy equipment sa NCBI Construction sa dapit.

Sumala sa iyang pag-umangkon nga gikan sila nanihapon sa iyang uyoan ug patabok na niadtong gabhiona ug tungod kay nag una man siya mao na lamang ang iyang nalingian nga nabanggaan na kini sa motorsiklo nga gimaneho sa usa ka Warren R. Ragandang, 36, taga Laguindingan, Misamis Oriental.

Matud ni Police Senior Inspector Princess Joy Enriquez, tigpamaba sa Misamis Oriental Provincial Police Office, nga sa pagdala sa Tagoloan Rescue team sa St. Paul Hospital, patay na kini nga gideklarar sa mga doktor.

Ang driver sab sa motorsiklo nadala sa Northern Mindanao Medical Center human nagkadugo sab gumikan sa aksidente.

Daghan ang nakasaksi nisulti nga kusog og padagan ang motorsiklo ug posibleng wala nakamatikod sa biktima nga mitabok tungod sa kangitngit.

Nakuhaan usab sa video ang pag-rescue sa Municipal Risk Reduction Management Office ngadto sa biktima kon asa dihang gipost kini sa Facebook page sa Superbalita diin daghan ang nikomento nga labihan kahinay sa mga lihok sa rescue team nga namatikdan nga nagtinga pa ang biktima.

Adunay usab mikwestyon sa kagamhanang lokal nganong ngitngit ang dapit ug walay streetlight.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph