NAG-UNA si kasamtangan Provincial Board Member Prexy Elipe sa Superbalita online poll sa magpapili pagka bise-gobernador sa probinsya sa Misamis Oriental.
Kini batok sa iyang kaatbang nga kasamtangan gihapon Provincial Board Member Jigjag Pelaez.
Ang online survey upat ka adlaw ang botasyon kon asa adunay 877 ang misalmot sa pagboto ug si Elipe nakakuha og 555 votes batok Pelaez nga adunay 322 ka votes.
Tungod niini mapasalamaton si Elipe sa inisyatiba sa Sun.Star Superbalita nga nagpasiugda niini.
Iyang gipahinungod iyang pag-una ngadto sa katawhan sa Misamis Oriental kinsa misalig sa iyang kandidatura ug plataporma.
“Mapasalamaton kita sa mga Facebook users nga misalmot sa maong online survey ug makasaad kamo nga dili nako pakyason ang mga residente nga misalig sa akong mga programa,” butyag ni Elipe.
Nagpasalamat usab kini sa Superbalita sa inisyatiba nga makalihok ang demokrasya ug kagawasan sa prensa aron makuha ang pulso sa katawhan.
Matud ni Elipe nga makadugang kini sa iyang kadasig ning nagpadayon ang kampanya.
Ang Superbalita aduna nay 42,311 followers sa kasamtangan kon asa organic followers ug Facebook users nga nagikan sa siyudad sa Cagayan de Oro ug Misamis Oriental.
Atol sab sa botohay moabot ngadto sa 7,606 ang total reached niini.