CEBU. Kining bus driver nipaubos sa kinalit kalit nga drug test nga gipahigayon sa Philippine Drug Enforcement Agency sa Cebu North Bus Terminal sa siyudad sa Mandaue niadtong Lunes, Abril 15. (SunStar foto/ Allan Cuizon)
CEBU. Kining bus driver nipaubos sa kinalit kalit nga drug test nga gipahigayon sa Philippine Drug Enforcement Agency sa Cebu North Bus Terminal sa siyudad sa Mandaue niadtong Lunes, Abril 15. (SunStar foto/ Allan Cuizon)

Upat ka bus driver positibo sa drug test

UPAT ka bus drivers ang nipositibo sa paggamit ug illegal nga drogas sa gipahigayong surprise drug test atol sa gihimo nga Oplan 'Huli Week' sa Philippine Drug Enforcement Agency (PDEA) 7 ganinang buntag, Abril 15, sa upat ka mga dagkong bus terminals sa tibuok rehiyon.

Ang upat kay kuyog sa 736 ka mga bus driver, konduktor ug uban bus personnel nga gipaubos sa kinalit nga drug test sa PDEA 7 sa Cebu South Bus Terminal (CSBT) sa siyudad sa Sugbo ug Cebu North Bus Terminal (CNBT) sa siyudad sa Mandaue, sa Dumaguete City Bus Terminal sa Negros Oriental ug sa Dao Integrated Bus Terminal sa siyudad sa Tagbilaran, probinsya sa Bohol.

Ang upat ka nipositibo puros gikan sa Bohol, hinuon subject pa kini alang sa confirmatory test.

Sa CNBT, 139 ka mga bus driver ug konduktor ug 179 sa CSBT ang napaubos sa kinalit nga drug test ganinang buntag.

Samtang sa Dumaguete City, adunay 132 kanila ang napaubos sa surprise drug test.

Gitug-an ni Wardley Getalla, pangulo sa PDEA 7, nga pamaagi kini aron sa pagsiguro nga wala nagmaneho sa mga pampasaheroang bus ang mga tig- gamitan ug ilegal nga drugas ug alang ra usab sa kaluwasan sa mga pasahero ilabi na karung Semana Santa.

Dugang ni Getalla nga kinahanglan mapaubos gyud sa drug test ang mga driver lakip na ang mga konduktor kay sagad sa mga aksidente sa kadlananan nag lambigit sa mga drivers nga nakainom o ubos sa ginadili nga drugas.

Usa sa mga bus driver nga si Federico Villamor sa Vallacar Transit sa Cebu North Bus Terminal ang walay duha-duha nga mipaubos sa surprise drug test sanglit alang usab kini sa ilang seguridad.

“Dili man ko makuyawan kay gawas nga halos kada tuig, basta sa Semana santa naa o kana tingsakay gyud naa man gyud surprise drug test, ug labaw na kay dili man gyud ko mogamit og bisan unsa nga ilegal drugs,” asoy ni Villamor.

Niadtong Marso 29, nipahigayon sad ug surprise drug test ang PDEA kung diin 174 ka mga driver nga naa sa CNBT, CSBT ug mga V-hire ang gipaubos sa kinalit-kalit nga drug test.

Sa 174 ga nipaubos sa surprise drug test, pito kanila ang nagpositibo sa confirmatory test, usa niini driver diha sa CNBT.

Ang mga nipositibo sa confirmatory test kay giduso na ngadto sa Land Transportation Franchising and Regulatory Board, Land Transportation Office ug sa ilang kompanya alang na sa tukma nga silot ug alang sa pagpaubos kanila sa drug rehabilitation.

Dungan usab sa oplan Huli week, mao ang pag- inspection sa LTFRB ug LTO sa mga bus dnha sa mga terminal kon kompleto ba og dokumento ug wala bay deprensya ang ilang mga sakyanan.

Gani adunay pipila ka mga bus ang wala dayon kalarga dayon human nasuta nga nangahilis na ang ligid ug nangaponder na ang brake lights atol sa gipahigayong “Oplan Byaheng Ayos."

Matod ni LTFRB 7 Inspector Dennoh Noval nga kinahanglan gyud ug pakisusi ang matag bus nga mubyahe karong Semana Santa alang sa seguridad sa mga pasahero.

Hinuon human nga napailisan ang nakita nga depektuso, nakalarga ra usab ang maong mga bus.

Usa sab sa mga gitan-aw sa mga inspectors mao ang mga dash cam sa matag bus nga gihimong rekisito sa LTFRB aron ma record niini ang mga panghitabo atol sa pagbyahe.

Related Stories

No stories found.
SunStar Publishing Inc.
www.sunstar.com.ph