KRITIKAL ang kahimtang sa 21 anyos nga lalaki human gigukod ug giayo og luba sa wala mailang suspetsado Lunes mga alas 3:00 sa kadlawon sa Bulua, ning siyudad sa Cagayan de Oro.

Ubay-ubay nga samad nilubaan ang naangkon ni Alawi Alhabsi, 21, lumad nga taga siyudad sa Zamboanga, minyo, kasamtangang nagpuyo sa Bulua ning siyudad.

Nasayran nga naghulat ang biktima sa Fish landing area sa Bulua dihang nakakita og bikil sa wala mailang lalaki.

Wala gikabutyag ang giawayan sa duha hinungdan nga nisangpot ngadto sa pagpangluba. Pagtan-aw sa biktima nga mihublot og hait nga hinagiban ang suspetsado midagan kini sa kahadlok nga lubaon.

Nahitabo ang ginukdanay apan nasapon gihapon si Alhabsi ug deretso nga giluba hinungdan sa pagkaigo sa iyang likod, dughan ug tiyan nga bahin.

Human sa hitabo, misibat ang suspetsado nga gibyaan lamang nga nagbuy-od ug nagkadugo ang biktima.

Ang hitabo giresponde sa kapolisan sa Police Station 7 (PS7) sa Bulua apan daw bisan ang mga nakasaksi sa hitabo dili makatumbok sa nihimo sa biktima.

Niini, gidala si Alhabsi sa Northern Mindanao Medical Center kinsa kritikal ang kahimtang ning panahona.

Ang kapolisan sa PS7 nihimo na usab og dugang imbestigasyon aron pagsikop ug masilotan ang niluba sa biktima. (SVB)