Bata gi-hit and run

USA ka 5 anyos nga bata ang nabangaan sa dyip niadtong Lunes mga alas 8:50 sa gabii sa Zone-6, Bugo ning siyudad sa Cagayan de Oro.

Giila ang biktima nga mao si April Shane Liguinan, sa susamang dapit.

Sa gihimong pakighinabi sa Sun.Star Superbalita sa paryente sa biktima nga dili tiaw ang grabeng bun-og sa kalawasan nga naangkon niini human nabanggaan sa Bugo liner nga gimaneho sa wala mailang suspetsado.

Gibutyag sa mga nakasaksi nga anaa lamang sa daplin sa kalsada si Liguinan dihang nagginukdanay ang duha ka mga Bugo liner.

Dihang naapsan ang usa ka dyip mitipas kini sa pikas dalan ug miabot sa daplin diin nagtindog lamang ang biktima hinungdan sa pagkasapon niini.

Maayong pagkabangga ni Liguinan hinungdan sa pagkaligid sa biktima. Giingong daling misibat ang driver nga padayong giila sa kapolisan sa Police Station 6(PS6) sa Puerto.

Gidala Sabal Community Hospital sa Puerto ang biktima apan tungod sa naangkon niini giduso sa Northern Mindanao Medical Center.

Matud sa paryente nga leksiyon unta kini sa pipila ka mga driver nga maglakag tunga sa kalsada diin miresulta sa usa ka aksidente.

Sa pagsulat ning balita padayon pang giatiman sa mga doktor sulod sa balay tambalanan si Liguinan. (Stephanie V. Berganio)