MAHINUKLUGONG paghandom sa pagpasakit, pagkamatay ug pagkabanhaw sa atong Manunubos nga si Ginoong Jesus.
Manghinaut ang Nota bene nga makapanahon kita sa pagbalik-tan-aw sa atong tagsa-tagsa ka kinabuhi ug kung nahimo ba kitang takus ug angayan sa iyang balaanong sakripisyo nga maoy dugukan sa atong hugot nga pagtuo isip mga Kristiyano.
Gawas sa hataas nga bakasyon, unta mahimo kining maong okasyon nga oportunidad natong tanan aron sa pagbalik sa atong maayong relasyon sa Diyos, sa atong mga silingan ug komunidad, sa kinaiyahan ug sa atong kaugalingon.
Naay gisulti sa English, nga "your foolishness will go back to your body."
Ang paghinobra sa pag-inom og alak hangtud nga mosarasay na ug mahulog sa kanal mosantop sa sakit sa lawas o kamatayon.
Ang klase sa pagka-on, ilimnon ug panginabuhi makita sa atong hulagway karon.
Busa niadtong Abril 13, niapil ako sa usa "Lenten discernment o pagpamalandong” sa panahon sa kuwaresma nga gipasiugdahan sa Prayerful Reflection Action of Christians for Incarnational Spirituality (Praxis) Philippines diha sa Assumption School of Davao.
Apil sa pamaagi sa pagpamalandong mao ang paglantaw sa panghitabo sa kalibutan, nasud ug komunidad sa magtutuo karon.
Nakita nga luyo sa daghang kalamboan sa teknolohiya, siyensiya, politika, sosyal ug ekonomiya, nagpatigbabaw gihapon ang daghang katalagman nga hinimoan sa tawo.
Anaa nagtunhay ang kapobrehon, pagpanglupig, pagpatay, walay hustisya, giyera ug mga sakit nga wa pa madiskubre ang tambal.
Bisan sa isog nato nga presidente, naglipang gihapon ang gidili nga druga, kurapsiyon sa anaa sa gahum, daynastiya o ang paghupot sa politikanhong gahum sa usa o pipila lamang ka paryente, kahinay sa serbisyong sosyal sa gobyerno ug pagpili sa mga lideres nga dili angayan sa puwesto.
Sa laktod nga pagkasulti, daghan gihapong Judas nga nagpadako sa ilang tiyan ug bulsa taliwala sa kapobrehon ug kasakit sa kadaghanan.
Daw susama sila ni Judas nga nitalikod ni Jesus ug midawat sa 30 ka tipak nga salapi aron itaral ug ilansang siya sa krus.
Apan sa laing bahin, makahinuktok kita kung unsa gayud kaha ang papel ni Judas sa misyon sa pagtubos sa kalibutan ni Jesus?
Ang mga theologians nag-ingon nga gigamit sa Diyos si Judas aron madayon ang misyon ni Jesus nga gisaad sa Diyos ug gipanagna na daan sa mga propeta.
Kung wala si Judas, posible lahi nga tawo o sirkumstansya ang gamiton sa Diyos aron matuman kini.
Adunay nag-ingon sab nga ang mga Judas sa bag-ong panahon gigamit sa Diyos aron mapakita sa tawo ang iyang kahuyang ug kakulang aron magpalambo sa ilang pagtuo ug pagsalig sa Diyos nga nag-andam og balay alang sa tanan didto sa langit.