SEGURADONG hugopan og daghang mga pasahero, di lang ang tugpahanan, apil na sab mga pantalan ug terminal sa mga bus tungod sa taas-taas nga bakasyon ning pagsaulog sa Semana Santa.
Gani, kagahapon medyo nidagsang na og diyutay ang mga tawo sa Davao City Overland Transport Terminal (DCOTT) aron nga manguli sa kaprobinsiyahan.
Hinuon di pa gyud ingon kadaghan niini gumikan kay duna pa may mga trabaho. Apan gilauman nga mao kini ang mahitabong senaryo sa mosunod nga adlaw.
Mga pasahero sab nga manakay og barko sa pantalan o ka lansa padulong sa Island Garden City of Samal (Igacos), lauman nga modagsa sab.
Kay gawas sa pagsaulog sa kuwaresma, nahimo na sab nga tradisyon sa mga tawo nga magtapok ug mag-bonding uban sa ilang tagsa-tagsa ka mga pamilya.
Apan sa kanunay, padayon nga nag-awhag ang mga awtoridad ngadto sa publiko nga iprayoridad ang seguridad sa matag usa ug di magpasagad panahon nga manguli sa ilang mga lugar.
Di kalikayan nga ning panahona, mao sab ang ilihok sa mga dautang tawo aron pahimuslan ang panahon sama sa mga kawatan ug mangingilad.
Gawas niini, angay sab kitang magbantay tungod sa mga terorista nga nangita lang og tayming aron nga makasabwag og kasamok sa katawhan.
Kinahanglan nga gawas nga mag-amping kita sa atong kaugalingon, moabag sab kita sa atong mga awtoridad sa pagpatunhay sa kahapsay ug kalinaw.
Dako na kaayong tabang ang pagtaho ngadto sa mga pulis ug sundalo kon dunay mamatikdan nga mga katingad-an nga mga butang o mga tawo diha sa palibot sa terminal o kaha sa pantalan.
Magtinabangay ug magpakabana kita aron ang kasaulogan sa Semana Santa, sama sa nangagi nga panahon, molampos nga malinawon.