DIGOS CITY -- Gihangop sa mga mag-uuma sa Barangay Kapatagan ang nasinating mga pag-ulan sa miaging semana nga epekto sa cloud seeding operations nga nagsugod niadtong Abril 9.
Gipangunahan sa Bureau of Soil and Water Management sa pakig-alayon sa 900th Philippine Air Force Weather Group alang sa joint cloud seeding operations.
Sa gipaguwang datos sa Department of Agriculture-Disaster Risk Reduction and Management, nasayran nga anaa na sa unom ka mga lungsod ang apektado sa El Niño.
Pinakauwahing naigo sa El Niño mao ang lungsod sa Padada, human unang gideklara ang mga lungsod sa Bansalan, Matanao, Hagonoy, Kiblawan, ug Magsaysay.
Nasayran nga hilabihang naigo sa hulaw ang mga tanum nga humay, mais ug ubang high value crops sukad nagsugod ang hulaw, Nobyembre sa miaging tuig.
Sayo niini, nagbutyag ang Philippine Atmospheric, Geophysical and Astronomical Service Administration (Pagasa) nga molungtad pa sa bulan sa Hunyo ang hulaw.
Gibutyag sa DA Regional Office nga nagbutang na sila og 40 ka open source pumps alang sa mga irigasyon sa probinsiya diin naapektuhan sa El Niño.
Sa kasamtangan, adunay 200 ka open source pumps ang giabrihan sa Davao Region, matag pump makapatubig sa usa ka ektaryang umahan sud sa walo ka oras.
Gitinguha sa Risk Reduction Management Office nga maabot ang target nga 57 ka cloud seeding sorties hangtud sa Mayo 20.
Ang DA nagbutyag nga kinahanglang mahimo ang upat ka cloud seeding sorties sa usa ka adlaw diin duha ka operasyon sa buntag ug duha sab sa hapon.
Mga mag-uuma sa Brgy. Kapatagan, nalipay niini human nakasinati na sila og pipila ka pag-ulan sa miaging semana.
Matud sa mag-uumang si Felimon Ando nga unta magpadayon na ang mga pag-ulan sa ilang umahan aron nga mabuhi ang ilang mga pananum bisan El Niño. (Orlando B. Dinoy)