NAGHIMAS sa bakal sa prisohan ang lima ka giingong mangingilad diin ilang gipang-peke ang mga dokumento sa Lingap Para sa Mahirap aron makakuha sila'g medical assistance sa Department of Social Welfare and Development (DSWD) sa Barangay Mintal, Davao City.
Ang Tugbok Police Station nag-ila sa mga dinakpan nga sila Mirriam Jover, ang gitudlong maoy utok sa modus; Arnel Ardeño, Sherelyn Arañez, Roxan Gingone, ug usa ka Cherry Antecristo nga pulos residente sa Sitio Ilhan, Barangay Mandug, Buhangin District, Davao City.
Subay sa spot report sa Tugbok PNP nga magkuha na unta ang mga suspek og medical assistance sa DSWD-Mintal apan namatikdan kini sa mga personahe nga pulos peke ang ilang mga dokumento hinungdan nga sekretong mitawag og pulis ang maong buhatan.
Dihang giimbestigahan ang mga nahisgutan, nakuha sa ilang posisyon ang mga document stamp pad sa nagkadaiyang mga doktor, daghang mga identification card (ID), ug mga peke nga dokumento nga maoy ilang gigamit sa ilang pagtransak sa buhatan sa Lingap.
Sa inisyal nga imbestigasyon sa kapulisan migula nga modus sa mga suspek nga mag-imbento og ngalan sa pasyente, dayon himoan og sakit aron makakuha og salapi isip medical assistance sa gobyerno pinaagi sa DSWD.
Mihimo pa og dugang imbestigasyon ang kapulisan aron masuta kung kapila na ka higayon kining gihimo nga pagpangilad sa mga suspetsado.
Segun ni Police Major Ricky Obenza, hepe sa Tugbok Police Station ang reklamante batok sa mga suspek mao ang DSWD-Mintal ug ang barangay kapitan sa lugar gumikan gi-peke sab nila ang mga barangay clearance.
Kasong kalapasan sa Article 171 sa Revised Penal Code kon Falsification of Public Documents ang atubangon nga kaso sa mga suspetsado didto sa korte. (JPC)