GIPAMATUD-an sa host Milwaukee Bucks ang ilang pagkahimong No.1 overall human sa regular season pinaagi sa paglubong nga buhi sa Detroit Pistons, 121-86, kagahapon sa pagsugod sa ilang 1st round series sa National Basketball Association (NBA) 2019 Playoffs.
Ang 35 puntos nga biya ning maong kadaugan sa Bucks mao ang ikatulong labing dako sa kasaysayan sa playoffs.
Pagsugod pa lang, ningbulhot na dayon ang opensa sa Bucks ug nakaposte dayon sila’g 20 puntos nga labaw human sa 1st quarter, 38-18.
“I don’t know if they were ready for us,” matod sa labing sinaligan sa Bucks nga si Giannis Antetokounmpo. “But we just try to focus on ourselves. We just try to play with pace, run to our spots and try to make plays.”
Nagpadayon og burot ang labaw sa Bucks hangtod nga adunay higayon nga niabot kini og 43 puntos.
Gumikan kay kontrolado nila ang duwa, wala na gibabad og insakto sa Bucks sulod sa korte si Antetokounmpo ug igo lang kining niduwa sulod sa 24 ka mga minutos.
Apan bisan pa niini, ang labing lig-ong kandidato alang sa MVP title ning maong season nakamugna gihapon og 24 puntos ug 17 puntos aron pangulohan ang kompletong dominasyon sa Bucks.
Ang Bucks aduna pa’y laing unom ka mga magduduwa nga nakahimo og dobleng numero nga puntos.
Rockets 122, Jazz 90
Sa Houston, nagpakatap og 29 puntos ug 10 assists si James Harden aron tabangan ang host Rockets sa pagmakmak sa Utah Jazz sa ilang kaugalingong series.
Kanunay nga naglabaw og duha ka mga puntos ang Rockets apan nakamaneho ang Jazz sa pagpahak niini ngadto sa lima na lang ka mga puntos sa tungatungang bahin sa 3rd quarter.
Apan human niini, ningsulbong na sab ang opensa sa Rockets ug ning higayuna, wala na sila milingi og balik.
Trail Blazers 104, Thunder 99
Sa Portland, nimugna og 30 puntos si Damian Lillard aron agakon ang host Trail Blazers sa kadaugan batok sa Oklahoma City Thunder.
Ang kanhi sakop sa Thunder nga si Enes Kanter nimugna og 20 puntos ug career playoffs-high 18 rebounds alang sa Blazers.
Maayo sab nakaduwa alang sa Trail Blazers mao si CJ McCollum, kinsa niposte’g 24 puntos.
Celtics 84, Pacers 74
Samtang sa Boston, ang host Celtics ningpukan sa Indiana Pacers pinaagi sa pagpangulo nila ni Kyrie Irving ug Marcus Morris, kins nimugna og 20 puntos matag usa.
Si Jayson Tatum nidugang og 15 puntos alang sa Celtics samtang ningtampo og 10 puntos matag usa sila si Al Horford ug Gordon Hayward. (AP, ESL)