NASAKMIT sa Mandaue City Ballers ang solong liderato sa Bracket A sa 3rd Cebu Govenor’s Cup Inter-cities/municipalities basketball tournament quarterfinals round human nila mapukan ang host ug kanhi co-leader Medellin Sweeteners, 83-76, sa usa ka physical nga panagsangka sa Medellin Municipal Sports Complex niadtong Dominggo sa gabii.
Sinaksihan sa mabagang dumadapig sa Sweeteners, ang Mandaue City ni coach Gary Cortes wa mopakita og pagbahar sa ilang opensa ug depensa aron irehistro ang ilang ikatulong sunodsunod nga daog.
Si Gabriel Cometa mitali og 27 puntos samtang ang ilang bigman nga si Kenneth Brillo mipahagsa og 21, sagad niini sa ilawom nga bahin, alang sa Mandaue City.
Pinaagi sa pagpanginit sa mga kamot ni Art Marco kinsa maoy miabli sa unang sais puntos sa Mandaue, ang Ballers daling nakaposte og double figure nga labaw ug gisirhan ang first half sa 43-30 nga bintaha.
Apan sa pagsugod sa third quarter, si Gelmart Umpad inabagan nila ni Fritz Saladaga ug John Reil Booc mipahagsa og dakong rally nga nakapapugos sa Mandaue sa pagtawag og timeout.
Hinuon sa paghibalik sa korte, nagkumboya og balik sila si Cometa ug Brillo ug ning higayona miayuda na usab si Archie Bugsay aron isilyo ang kadaugan.
Si Umpad mipupo og 21 puntos samtang si Saladaga kinsa wala na makabalik sa korte human mapahamtangi og unsportsmanlike foul sa katapusang 2:56 segundos mitali og 14 alang sa Medellin nga nahagsa sa 2-1 nga baraha.
Gikasawo sa Medellin sa ikaduhang puwesto ang Balamban Ship Builders kinsa hingutas usab nga mipukan sa Argao team, 96-91.
Pinangulohan ni Jimwell Torion Jr., anak ni kanhi PBA superstar Jimwell “Tora-tora” Torion, ang Argao maoy nagkontrolar sa duwa sulod sa tulo ka mga kwarters.
Apan nisugod sa pagsakmit ang Ship Builders sa labaw sa tungatungang bahin na sa fourth quarter.
Si Dede Fernandez mitali og 27 puntos, Joshua Gellacone mirehistro og 22 puntos ug 17 usab ang natampo ni Ricky Timosa, lima niini gikan sa three-point area.
Sa sayo pa, ang Samboan mibuntog sa Dumanjug, 88-82.
Samtang sa Bracket B nga gipahigayon didto sa Tabuelan Municipal Gym, gikastigo sa defending champions Talisay City Aquastars ang Consolacion Sarok Weavers, 72-55.
Si Keith Taburnal mipupo og 18 puntos samtang 15 ang nahimo ni Kendrick Abarquez aron pangulohan ang Talisay.
Surprisa usab nga gipildi sa Tuburan Coffee Makers ang Minglanilla Archangels, 88-73, samtang gikulata sa host Tabuelan ang Sogod, 97-79, sa main game.
Ang Tuburan ug ang Talisay nagpabiling wala pay pildi sa Bracket B sa quarterfinals round. Sa Ang Aquastars maoy mo host sa Coffee Makers sa Abril 28. (JBM)