NAGTINGKAGOL na hinuon sud sa selda sa kapulisan ang usa ka lalaki human kini nagpabuto sa iyang armas, way kahadlok sa gipatuman nga election gun ban sa Commission on Election.

Dinakpan giila nga si Felicio Tanting, kinsa lumolupyo sa Barangay Mamacao, lungsod sa Sta. Maria, Davao del Sur.

Usa ka Nina Bayonita, 40 anyos, minyo, ang miadto didto sa Sta. Maria Police Station og misulti nga nagpabupt gyud ang suspek sa iyang armas alas 10:15 sa gabii, niadtong Dominggo.

Si Senior Police Officer 1 Eddie Lamilla ug mga kaubanang niresponde sa alarma maoy nakasikop sa suspek.

Gidisarmahan nila kini og nakuha gikan sa iyang posisyon ang kalibre .22 rebolber nga ginama sa nasud Germany.

May serial number kini nga 46394, may unod nga lima ka bala ug tulo ka baseyong bala niini nga nagtangag sa cylinder.

Kagahapong adlawa, pormal ng gikasohan ang suspek sa paglapas niini sa Comelec resolution number 8714. (Dondon Dinoy)