Free wifi sa CSBT

BISAN magnihit ang mga bus gumikan sa pagdagsa sa mga pasahero sa Cebu South Bus Terminal (CSBT) gumikan sa Semana Santa, sugod niadtong Lunes Santo, Abril 15, nakita sa tagdumala sa terminal nga dili laayon ang ubang pasahero nga nagpaabot og bus tungod sa libreng Wifi connections sa terminal.

Si Jonathan Tumulak, terminal manager sa CSBT, nibutyag nga dunay duha ka Wifi portal ang CSBT. Ang libreng Wifi sa Cebu Provincial Government pinaagi sa koneksyon sa Smart Communications, Inc. nga nagsugod sa miaging tuig, ug ang Google nga gasugod karong buwana, nga 70 ngadto sa 80 megabits per second (mbps) ang gipaspason sa koneksyon.

Matod ni Tumulak ang libreng Wifi connections usa sa mga pamaagi nga ma-updated ang mga pasahero sa unsay dagan sa trapiko sa ilang destinasyon ug kasikbit nga mga lugar.

Siya nipaambit nga gidasig nila ang mga information officer ug traffic managers sa matag local government unit sa lalawigan nga mag-post kon unsay dagan sa trapiko sa ilang dapit.

Ang CSBT ang usa sa 50 ka mga lugar sa Pilipinas nga napilian sa Google nga butangan og Wifi hotspots. (SCG)