SECTIONS
Monday, April 22, 2019
SUPERBALITA CEBU

Batan-on sentro sa ‘Siete Palabras’

MGA isyu kalabot sa kabatan-onan ang kabahin sa mga pamalandong sa Siete Palabras karong tuiga, sumala ni Cebu Archbishop Jose Palma.

Karong tuig sa mga batan-on, youth coordinator, piskal, manlalaban, mga pari ug mga indibidwal nga nalambigit sa mga buhat alang sa kabatan-onan, ang mamalandong sa pito ka katapusang mga pulong ni Kristo sa wala pa mamatay.

Kini mahitabo karong Biyernes Santo, Abril 19 sa Cebu Metropolitan Cathedral, dakbayan sa Sugbo, sugod sa alas 12 sa udto.

Si Palma niingon ang ilang gipili mga pari, youth, ug magtiayon kansang mga kasinatian maghatag og inspirasyon sa kabatan-onan.

Matod niya, ang pagpili gisentro sa tema sa tuig sa kabatan-onan.

“Mao nga atong committee maoy mag-research ug mag-invite sa ilang gitan-aw makahatag og maayong pamalandong in response to the theme of the year,” sigon sa arsobispo.

“Give time for the Siete Palabras and I know that we all will learn lessons alang natong tanan because we live in the community,” dugang ni Palma.

Si Rev. Fr. Andrei Ventanilla, secretary sa arsobispo ug vice chairman sa Commission on Youth (COY), ang magsilbi nga introductory speaker.

Si Rev. Fr. Joriz Foz Calsa, pangu sa COY sa Ministry of the Salesians sa Don Bosco Visayas ug Mindanao ang mobatbat sa unang mga pulong, “Amahan pasayloa sila kay wala sila masayod sa ilang gibuhat.”

Si Rev. Fr. Joselito Gutierrez, over-all festival chairman sa National Youth Day (NYD) ug miyembro sa team of pastors sa St. Joseph the Patriarch Parish sa Mabolo, Cebu City, ang mamalandong sa “Sultihan ko Ikaw, karong adlawa ato ka sa paraiso uban kanako.”

Si Atty. Maria Liza Jorda, kanhi Cebu City Prosecutor ug karon Tacloban City Prosecutor, ang motuki sa ikatulong mga pulong, “Babaye ania ang imong anak; anak ania ang imong inahan.”

Ang youth coordinator nga si Frankel Gerard Margallo ug aktibo sa COY, ang mobatbat sa ikaupat nga mga pulong, “Diyos ko, Diyos ko, nganong gibiyaan mo ako?”

Si Allan Andrei Badayos, chief marketing officer ug board member sa SkyLabs Technologies, ang mohatod sa ikalimang mga pulong, “Giuhaw ako.”

Si Atty. Eugene Orbita, document examineer ug sakop sa Brotherhood Christian Businessman and Professionals (BCBP), ang mopaambit sa ikaunom nga mga pulong, “Natapos na.”

Sa ikapitong katapusang mga pulong, “Amahan sa Imong mga kamot itugyan ko ang akong espiritu,” sila si James Michael Arela, district sales manager ug Pedy Arela, presidente sa GA, ang mamalandong. Sila pulos mga miyembro sa Couples for Christ.

Si Palma ang magsibli nga katapusang mamumulong sa Siete Palabras.

Ang tema karong tuiga: Filipino Youth in Mission: Beloved. Gifted. Empowered.

Ang Siete Palabras mahitabo usa ka semana sa dili pa magbukas ang National Youth Day karong Abril 23 hangtod sa Abril 27 diin ang Sugbo maoy host ug gilantawan nga 17,000 ka mga batan-on ang mosalmot.

Si Palma nidugang dunay aspeto sa mga batan-on nga giingon sa Santo Papa nga sila gusto madungog.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!