NAGNIHIT sa ilang suplay sa tubig ang 19,800 ka mga panimalay nga nahimutang sa downtown ug uptown areas sa dakbayan sa Sugbo gumikan sa epekto sa El Niño busa sila rasyunan.
Si Konsehal Dave Tumulak, kinsa nipatawag og tigom kagahapon kauban ang Metro Cebu Water District, barangay fire auxiliary, Bureau of Fire Protection (BFP) ug Department of General Services, niingon nga hinay ngadto sa way agas ang gripo sa maong mga balay.
Base sa listahan sa Cebu City Disaster Risk Reduction and Management Council apektado ang Barangay Guadaluoe (Horseshoe drive ug tipik sa Banawa), Capitol Site (Oppra, Ipil-Ipil, Clavano, Juana Osmeña), Camputhaw, Sambag I, Sambag 2, Pier area, North Reclamation Area, Bulacao, Inayawan, Cogon Pardo, Pob. Pardo, Kinasang-an, Basak San Nicolas, Basak Pardo, Quiot, Mambaling, N. Bacalso, Duljo Fatima, San Nicholas Proper, Sawang Calero, Suba, Pasil, Pahina San Nicolas, Pahina Central, Kalubihan, Ermita, Calamba, Zapatera, Day-as, San Antonio, Tejero, T. Padilla, Parian, Kamagayan, Labangon (Katipunan, Salvador extension).
Ang distribution gisugdan na kagahapon ug gipadayag ni Tumulak nga ilang regular nga hatagan ang maong mga dapit og tubig gamit ang 40 ka mga water tanker ug fire truck sugod alas 9 sa buntag hangtod alas 3 sa hapon matag adlaw.
Sa 40 ka firetrucks, walo niini iya sa BFP; upat sa Cebu City Givernment; tulo sa MWCD ug 25 nga gipanag-iya sa barangays, diin ang mga barangay nga apektado gidestinohan na og mga water tanker.
“Kini gibuhat para pagpamenos sa epekto sa ting-init labi na karon nga naglisod sab ang MCWD sa ilang mga tubig,” padayag ni Tumulak. (PAC)