“NAKONSENSYA ko sa akong gibuhat”.
Mao ni ang gipamulong ni Jessie Mediquillo samtang nagtiyabaw human siya miatubang sa media ug niangkon nga siya ang nidunggab patay sa makadaghang higayon kang Tessa Mae Ygay sulod sa guard house sa Cogon Cruz Integrated School, sa Barangay Cogon Cruz, Siyudad sa Danao.
Matod niya nga iyang napatay ang dalagita tungod sa iyang kalagot sa amahan niini sa dihang gihagit siyag patay.
Nasuko, matod pa, ang amahan nga iyang giupawan si Tessa Mae ug siya usab ang kanunay nga pangitaan kon di makauli sa ilang balay.
“Gihagad man ko niyag patay kay nasuko man siya nga akong giupawan ang iyang anak. Sige man gud nig laag nya ako ang pangitaan sa amahan,”matod ni Mediquillo.
Maghatagan siyag kwarta aron ipalit og bugas sa pamilya ni Tessa atol sa iyang sweldo tungod kay lisod ang kahimtang niini.
Gihimakak niya nga aduna silay relasyon sa biktima sukwahi sa unang pagtuo nga uyab silang duha.
Apan si Police Brigadier General Debold Sinas nitug-an nga aduna silay mga ebidensya ug saksi nga makatumbok nga aduna silay relasyon sa dalagita.
Adunay laing uyab si Tessa nga nagpangidaron usab og 14 nga usa sa gituohan sa kapulisan ug pamilya nga hinungdan nga gipatay ni Mediquillo si Tessa.
Ang maguwang ni Tessa nga menor de edad nisaysay sa mga tigbalita nga gibaharan ni Mediquillo ang iyang manghod.
Matod ni Jen (dili niya tinuod nga ngalan) nga nibahad si Mediquillo nga apilon niya sa pagpatay ang uyab ni Tessa human niya masayri ang relasyon.
Suod na sa ilang pamilya si Mediquillo ug mag-adtoan sa ilang balay ug magpaluto.
“Gipatay man niya akong manghod, patay sad unta ni siya, kay niingon man na siya nga kon mapatay daw niya akong manghod ug akong papa, maghikog daw na siya,” matod ni Jen.
Abril 5 pasado alas 7 sa gabii napatay ni Mediquillo si Tessa pinaagi sa pagdunggab sa makadaghang higayon gamit ang kutsilyo.
Gibaatan ni Mediquillo ang baba sa biktima aron di makasinggit atol sa iyang pagdunggab sa dughan niini.
Human niya mapatay iya kining giputos sa banig ug gidala sa septic tank sa sulod sa eskwelahan apan naglisod siya sa pag-ukab.
Nakahukom siya nga didto sa septic tank sa luyo sa tunghaan niya ihulog ang lawas sa biktima mga tungang gabii na.
Human niya kini mahulog nilayat siya sa koral ug misibat paingon sa lungsod sa Tabuelan.
Niadtong Biyernes, Abril 11, namatikdan sa Tabuelan police ug tungod sa kahadlok, siya nitahan.