NAPUGWAT ang tanan dihang giwakli sa ABS-CBN Manila ang advertisement ni Lito O sa pinulongang Bisaya o Cebuano. Gidawat na man unta ang bayad nga nagkantidad og P95,000.00.
Ikiha ni Lito ang ABS-CBN sa pagsupak sa Election Fair Act. Ang maong pagwakli nakapukaw sad sa away sa mga pinulongan dinhi sa nasod labi na sa Cebuano batok Tagalog.
Sa panahon nga si Lito pa ang gobernador sa Sugbo, gipakita niya ang iyang paglaban sa atong pinulongan. Gimando niya ang pagtukar sa Binisayang hubad sa national anthem sa matag sign- on sa mga estasiyon sa radyo.
Gidasig niya ang pagsulti sa atong pinulongan sa bisan asang tapok o kalihukan nga himuon diha sa atong katilingban. Kamatuoran kadto sa iyang pagmahal sa atong dila.
Ipa-Tagalog sa ABS-CBN nga unta alang man kini sa katawhan sa Central Visayas ug sa mga lumolupyo sa ubang mga dapit sa Mindanao nga maabot sa signal sa ilang estasiyon sa telebisyon dinhi sa Sugbo.
Ang nakadaot ning mga dumadapig sa Tagalog ipakita gyud nga ang maong pinulongan hawod ingon man superior sa tanang mga pinulongan sa nasod.
Ang nakangil-ad pod mao kining pagmaskara ning maong pinulongan ngadto sa pagka Filipino language. Sagulan lag mga pinisik nga Cebuano o Ilonggo o Ilokano ang Tagalog ingnon dayon nga Filipino Language.
Nilampos si kanhi pamuno Manuel Quezon pagpalusot og probisyon sa 1935 Philippine Constitution nga naghimo sa Tagalog nga basihanan sa atong national language.
Sa dakong kasaypanan, gideritso ang paghimo sa Tagalog nga maoy national language sa mga dekada nga ningsunod human sa 1935, imbes basihanan lang unta.
Ang ubang mga pinulongan nakabawi dihang gisuwat ang 1987 Constitution panahon ni kanhi Pamuno Cory Aquino diin nagbuot nga ugmaron ang tinuod nga pinulongan nga Filipino nga maoy atong national language. Sakpan kini sa tanang pinulongan sa nasod.
Apan nakita ang ka-imposible sa pag-ugmad og tinuod nga pinulongang Filipino. Monang Tagalog lang gihapon ang nahimong basihanan nga ingnon dayon nga Filipino. Sa ato pa ang Tagalog nahimo nang Filipino hinuon. Pastilan!
Modagan si Lito pagka senador. Pabor kaayo ni nato kon modaog.
Kay atong ipatrabaho niya nga ang mga major languages sa Pilipinas sama sa Cebuano itudlo sa high school ug kolehiyo sa Visayas ug Mindanao. Di kay sa primary grades lang. Aron patas sa Tagalog. gapasan.erns@yahoo.com