SAMTANG nagkainit ang dagan sa pulitika karon, bahin sa makalimtan na ang pagkabana ug pagbantay sa katawhan sa batakang gamitunon sa eleksyon -- ang Precinct Count Optical Scan (PCOS) machines.

Ang Smartmatic-TIM, supplier sa PCOS nga gigama sa China, gihatagan og tagal o deadline karong Pebrero 28 o Dominggo sa pagkumpleto sa paghatod sa Pilipinas sa 82,200 ka PCOS machines.

Nasayod na kita nga apike nang daan ang paghukom sa paghigayon sa labing unang poll automation karong Mayo 10 ug kon di kini mahatod sa tukma nga panahon, dakong implikasyon kini sa umaabot nga eleksyon.

Tataw nga dakong kaguliyang kon mapakyas kini ug mobalik sa karaang mano-mano sa botasyon ug pag-ihap sa mga boto.

Sumala sa Comelec, nikabat pa lang sa 64,620 ka PCOS machines ang naa sa bodega sa Smartmatic sa Cabuyao, Laguna ug padayong pang gisusi sa iyang kalidad aron hingpit nga magamit.

Hinuon, si Commission on Election (Comelec) Commissioner Gregorio Larrazabal nipahibalo sa miaging press briefing sa kaulohan nga ang Smartmatic-TIM nisaad nga mohatod sa tanang PCOS machines karong Biyernes, mas sayo sa gitagal kanila nga panahon.

Maayong bantayan kini, dili lang sa mga nagpakabanang grupo o partido, lakip na kitang mga yano nga lumolupyo aron magpalampuson ang pagsuway sa unang automated nga eleksyon sa nasod.

Maayong hansay ug magmalinawon ang makasaysayanon nga umaabot eleksyon.