HINGPIT nang gipasaka sa Lapu-Lapu City Prosecutor’s Office ang kasong murder batok kang Renato Llenes, ang suspetsado sa linuog nga kamatayon sa dalagitang si Christine Lee Silawan.
Ang kapulisan sa Lapu-Lapu City Police Office (LLCPO) nga gipangulohan ni Police Colonel Limuel Obon maoy nagsilbing reklamante batok kang Llenes human nga wala gayud mopirma ang inahan ni Silawan nga si Lourdes ug ang amahan niining si Mario sa reklamo nga gihikay sa kapulisan.
Gipasabot ni Obon nga wala na nila huwata pa nga makadesisyon ang mga ginikanan ni Silawan nga mopirma sa kasong ilang gisang-at batok kang Llenes sanglit buot na niya nga adto na sa piskaliya ang kaso niini aron maka-focus na usab sila sa lain nilang gimbuhaton hilabi na ang paghatag ug seguridad sa dakbayan sa pag-obserbar sa Semana Santa.
Subling giklaro ni Obon nga lig-on ang mga ebidensya nga ilang gihuptan batok kang Llenes, hilabi na nga positibo kini nilang natumbok sa kuha sa close circuit television (CCTV) cameras samtang padulong pa kini sa simbahan sa Sacred Heart Parish sa Barangay Pajac aron pakigkitaan ang dalagita.
Ang naasoyng kuha sa CCTV gikan sa usa ka panimay sa Barangay Bangkal nga pipila lang ka metros ang gilay-on sa panimalay sa suspetsado pasado alas 5 sa hapon sa Marso 10.
Positibo usab kini matod pa nga giila sa mga tawo sa dapit nga ilang gipakita sa mga kuha sa CCTV base sa ilang gihimong pakisusi.
Gawas sa maong mga ebidensya, giingong gi log-in usab ni Llenes ang tulo ka mga Facebook account niini nga maoy gigamit niya sa pakig-communicate ni Silawan atubangan sa iyang iyaan nga si Fermina ug sa maguwang nga babaye niini uban ang abogado ni Llenes nga si Atty. Manuel Degollacion Jr.
Gawas niini anaa usab atol sa pag log-in ni Llenes sa iyang mga FB account sila Obon ug Lapu-Lapu City Mayor Paz Radaza.
Ang tulo ka mga FB account ni Llenes nga giingong iyang gigamit sa pakig-communicate ni Silawan mao ang CJ Diaz, Rhainheart Llenes ug Marialyn Dela Cruz.
Aduna usay laing mga witness ang kapulisan nga matod pa nagmatuod usab nga ang maong mga FB account iya ni Llenes sanglit ila kining ka- chatmate usab.
Sa pagkakaron gikatakdang huwaton na lang sa kapulisan ang resulta sa DNA test sa mga sapot ug ubang ebidensyang ilang nakuha sa suspetsado sama sa gunting nga maoy nagsilbing murder weapon kun motukma ba kini sa dugo sa dalagita.
Nakuhaan na usab matod pa sa kapulisan ug affidavit ang tanang mga tawo nga gihisgotan ni Llenes atol sa ilang gipahigayong walkthrough sama sa barbero o tigtupi niini ug ingon man ang tag-iya sa tindahan diin siya giingong nag-inom human mabuhat ang krimen.
Atubangan ni Assistant City Prosecutor Sheilamar Abadia subling gibarogan ni Llenes nga tinuod ug sakto ang tanang affidavit ug pangangkon nga iyang gipirmahan ug giluwatan kalabot sa kamatayon ni Silawan.
Wala gayud matod pa siya pugsa sa pag-angkon sanaasoyng krimen o ba kaha gihaylo ug salapi aron lang moangkon.
“Dili na nako bawion mao na ni siya gusto nako mahuman na ning kasoha para mogaan-gaan akong konsensya niya mapahuway na si Christine. Mangayo unta ko niyag pasaylo ug sa iyang pamilya, sa akong pamilya ug sa akong mga anak. Manghinaot ko nga dili sila maparehas nako” matod pa ni Llenes.
Gitagaan hinuon siya ug 10 ka adlaw ni Fiscal Ruso Zaragoza, ang City Prosecutor sa dakbayan sa Lapu-Lapu, sa pagsumiter sa iyang counter- affidavit sa kasong gisang-at batok kaniya bisan pa man kung aduna siyay extra-judicial confession kalabot sa kaso.
Pagpasabot ni Zaragoza nga ilang paninguhaon nga makapagawas sila ug resolusyon sa kaso nga gisang-at sa kapulisan batok kang Llenes sa dili pa usab mapupos ang 60 ka adlaw nga ilang gitagana sa preliminary investigation sa kasong gisang-at usab sa National Bureau Of Investigation ( NBI) 7 batok sa 18-anyos nga suspetsadong unang napasakaan ug kaso sa kamatayon ni Silawan.
Gumikan kay managlahi ang nahisgotang mga suspek nga gipasakaan ug kaso sa kamatayon sa dalagita bugtong usa ra gayud ang mahimong mapasaka niini sa korte.
Ang kaso sa 18-anyos unang napasakaan ug kaso sa kamatayon ni Silawan nga gipasaka niadtong Marso 18.