Claras: Tigbak ang komisyon

DAGHAN ang nalipay sa gihimo sa presidente sa dugay na nga nalangay nga 2019 national budget nga nagkantidad og 3.8 trillion pesos.

Gipirmahan man tuod niya ang budget apan wala niya giapil sa pag-aprobar ang pipila ka mga gahin.

Mao kini ang gitawag og “budget insertions” gikan sa mga miyembro sa House of Representatives og pipila ka mga senador nga nagkantidad og 95.3 ka bilyon ka pesos.

Buot ipasabot, magamit na ang budget nga gipanday sa nakalabay nga tuig para sa kasamtangan tuig 2019, gawas lang sa mga gipangtangtang.

Buot ipasabot sab nga kadtong mga kongresista nga nagpanilap na unta sa ilang madawat gikan sa mga kontraktor alang sa ilang “budget insertion” igo na lang sa pagpanglipaghong nga nahimong bato ang unta kwarta alang sa ilang kampanya.

Kahinumdoman nga kaniadtong Nobiembre 27 sa miaging tuig, unang nahibaw-an sa presidente ang maong “budget insertion” og maoy hinungdan nga naka-pamalikas kini atol sa pagsubo sa bag-o nga Bohol Panglao International Airport.

Pagka-sunod adlaw, mipagawas si Senador Ping Lacson sa iyang “expose” og matod pa niya, naglana-lana kuno sa “pork” ang gisumiter nga budget sa tuig 2019.

Tungod niini, nalangan gyod ang pag-aprobar sa maong proposed budget sanglit mibabag man ang senado og mibahad sab ang presidente nga dili niya pirmahan ang planong budget kon gisudlan kini sa “pork barrel.”

Gani, gikonpirmar sa usa ka kongresista ang maong budget insertion.

Matod pa niya, kanunay man gyod nga dunay budget insertion.

Apan ang nakalahi lang sa budget insertion sa 2019 kay hilabihang dakoa ra pod kaayo ang maong budget insertion.

Unsa man kanang gitawag og budget insertion?

Matod pa sa maong kongresista, usa kana ka gahin alang sa usa ka proyekto kasagaran farm to market road (FMR) o flood control project o kaha covered court nga magamit isip evacuation center.

Ibutang kini sa distrito sa kauban nga kongresista unya ang nagbutang sa maong budget nga kongresista mao ang magbuot sa kontraktor nga mohimo o mo-trabaho sa maong proyekto.

Matod pa, automatic nga madawat sa maong kongresista ang iyang komisyon gikan sa kontraktor sanglit gipalit na man daan sa mga piling kontraktor ang mga proyekto nga nasulod sa “budget insertion.”

Pasabot, matod pa, nga kon dako ang iyang “budget insertion,” dako sab ang iyang madawat nga komisyon.

Kon dako ang iyang komisyon unya kandidato siya sa umaabot nga piniliay, seguradong bibo gyod ang iyang kampanya tungod kay daghan man siya og ikagasto.

Mao kini hinungdan nga subo ang panagway sa maong mga kongresista sa gihimo sa presidente sa pag-veto sa maong mga “budget insertion.”

Apan daghan ang nalipay sanglit medyo patas na ang pag-gasto sa kampanya – kwarta personal na sab ang gamiton, dili kwarta nga gikan sa gobierno.

Dili madayon ang planong pagbisita ni PRRD sa Bohol karong Abril 30.

Mao kini ang balita nga atong nakuha gikan sa PMS.

Wala ipahibalo ang hinungdan sa maong pagkansela nga matod pa suporta unta ni PRRD sa kandidatora sa iyang kanhi Cabinet Secretary nga si Jun Evasco.

Dili usab mahibaw-an kon duna bay naka-schedule nga laing higayon sa pagbisita ni PRRD sa Bohol sa wala pa ang piniliay sa Mayo 13.

Unsa kahay hinungdan sap ag-kanselar sa maong Bohol visit karong Abril 30?

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph