ANG uwahing higayon nga si Davao City coach Rachelle “Ching” Delos Reyes napatawag alang sa national duty kaniadto pang 2008, diin assistant siya kaniadto.
Apan karon, natudlo siya nga head coach sa Philippines U15 Girls National Team (U15 WNT) alang sa Asean Football Federation (AFF) U15 Girls’ Championship 2019 karong Mayo 9 ngadto 22 sa Chonburi, Thailand.
Si Delos Reyes, kanhi national team member ug board of director sa Davao South Regional Football Association (DRFA), napili nga head coach sa U15 WNT gikan Marso ngadto Mayo 31, 2019.
Isip head coach, si Philippine Football Federation (PFF) general secretary lawyer Edwin Gastanes, sa iyang suwat, may petsang Marso 1, 2019 kang Delos Reyes, nagsulti nga siya may “discharge duties traditionally attached to the position, including submission of a technical report after the competition. She will be duly compensated for her coaching services during the term of her appointment.”
“Very privileged kaayo kay gihatagan nila og opportunity ang mga provincial coaches (It is a great privilege that they have given provincial coaches this opportunity),” suma niya nga mo-coach unta sa Davraa girls futsal team ngadto sa Palarong Pambansa 2019, sa Facebook interview tali SunStar Davao.
Mag-abaga kaniya si Cebu-based Apol Barinan, nga nahimugso sa Davao City, samtang ang goalkeeping coach mao si Manila-based Glaiza Artuz sa Sta. Barbara sa Iloilo City. Ang uwahi maoy goalkeeping coach sa Far Eastern University (FEU) women’s football team.
Si Delos Reyes nagdugang nga ang nakalabay’ng katuigan siya ug si Barinan nagtinabangay aron makaprodyus og mga magduduwa sa national team sa nanglabay’ng tuig.
Kahinumduman nga si Delos Reyes maoy assistant coach sa Philippines U13 girls team niadtong 2008 diin ang magduduwa gikan Davao City nga sila Nina Arrieta, Janna Barcemo ug Nina Yanto, nga kasamtangang nagduwa sa UAAP alang University of Santo Tomas, ang mga miyembro.
Anaa sa 29 ka magduduwa ang mipailawom sa inisyal nga hugna sa training camp ug ang ihap mikunhod ning bag-o lang.