Editoryal: Pamalandong

Editorial Cartoon by John Gilbert Manantan
Editorial Cartoon by John Gilbert Manantan

MAS mangtas kon manimalos ang kinaiyahan tungod sa pag-abuso sa katawhan. Lisod matagna ang trahedya sa kalikupan gawas nga walay igong gahom sa pagsanta bisan ang labing lantip og pangutok sa sayantipiko o malaumong tawo sa kalibotan. Ang kalikupan taas og pailub apan dunay kinutuban ug ang silot sa bathalad sa kinaiyahan matagamtaman.

Usa kini ka pamalandong human sa pagdahili sa dakong bukid sa Barangay Tina-an, dakbayan sa Naga sa miaging kaadlawon, diin nipatay na og kapin sa 20 ka mga tawo ug daghan pang wa igkita nga gituohang napriso sa kabalayan nga natabunan og yuta.

Una na sa tanan, ang Tina-an nasulod sa dakong bahin sa Naga nga mina sa semento. Nagtupadtupad ang mga pabrika sa semento ngadto sa silingang lungsod sa San Fernando. Apan ang pabrika sa Naga maoy labing karaan. Makita nato nga nagputi ug upaw na ang dakong bahin sa kabukiran tungod sa pagmina sulod na sa pipila ka dekada.

Ang Apo Land and Quarry Corp (ALQC) maoy dunay permiso sa luna nga midahili ang yuta gikan sa Mines and Geosciences Bureau (MGB) sa Department of Invironment and Natural Resources (DENR). Hinuon, matod sa ALQC, wala pa silay operasyon sa pagmina sa dapit nga midahili apan nianngkon nga dunay site development dili halayo sa dapit nga nidahili.

Laing pamalandong. Ang kalikupan nagpasidaan na tungod sa dagkong liki sa yuta. Gikataho nga ang lokal nga kagamhanan apan, ang ALQC ug MGB) sa DENR wala makakita ug nisuwat nga dili kini risgo? Klarong pagpabaya sa trabaho.

Samtang, ang mga minahan ug mga pabrika sa semanto sa kabagatang bahin dako og natampo sa trabaho ug ekonomiya sa Sugbo sulod sa dugay nang panahon apan, kinahanglan usab nga balanse ug katugbang ang resposanble nga pag-ugkat sa yuta ug pagpahiuli. Klarong wala mapatuman. Laing leksiyon kini. Iampo nato ang biktima sa trahedya.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph