NIADTONG Dominggo, Bendita sa Lukay, nagkasabot kami sa akong higala ug kauban sa Manila Broadcasting Company nga si SG Romy Coquilla nga motambong sa Santos nga Misa sa San Antonio de Padua Parish sa alas 3 sa hapon.
Sanglit mga debotong Katoliko, sa wa pa kami misud sa entradang pultahan sa simbahan, namalit kami og krus nga lukay aron pabenditahan sa pari. Kay nagdaginot lagi, usa ka krus ang akong gipalit nga kantidad og P10.
Sabagay, sa akong huna-huna, di man padaghanay ug pamahalay sa krus ang akong tuyo kon di ang pagtuman sa usa sa mga makasaysayang tradisyon namong mga Katoliko.
Niadtong adlawa, gihandom sa mga Katoliko ang pagsud ni Kristo sa Herusalem alang sa pagkompleto sa Paschal Mystery. Sa Liturgical Calendar human sa Vatican II, ang Simbahan nagselebrar sa Passion Sunday duha ka Dominggo sa di pa ang pagkabanhaw, ug ang Palm Sunday mao ang pagsugod sa Semana sa Santa. Ang Simbahan naghiusa sa duha aron mohingusog sa solemnidad sa Semana sa Santa.
Ang prosisyon sa Palm Sunday giporma sa mga Kristiyanos kinsa, nga sa hingpit nga pagtuo, nihimo sa ilang kalihukan uban sa hingpit nga kahulogan.
Usa sa mahinungdanon nga pulong nga natisok sa akong hunahuna ug kasingkasing ning maong selebrasyon ang “pasyon” ni Kristo nga magpasaylo sa atong mga kasal-anan sanglit gihigugma kita sa Ginoo bisan pa sa atong pagkamakasasala.
Kining maong pasyon, mahimo usab natong iaplikar sa atong kaugalingon sama sa pagbaton og pasyon sa paghigugma sa atong isig-ka-tawo, ilabi na sa atong pamilya.
Ning Semana Santa, anaa unta kanato ang pasyon sa paghigugma ug pagpasaylo sa atong mga kaaway sa bisan unsang butang dinhi sa kalibutan.
Nakasulti ako niini tungod kay namatikdan nako nga ang atong mga kaubanan sa buhat nag-atakehay na tungod sa ilang gilabanan nga mga politiko.
Busa, nanghinaut ako nga makabaton unta kita og pasyon sa paghimo sa tinuod nato nga misyon isip mga mamahayag ug labaw sa tanan ang paghigugma sa atong isig-ka-ingon.
Sa naggunit sa renda sa atong gobyerno, mabatonan unta nila ang pasyon sa pagkamapasayluon sa ilang mga kontra ug ipadayon ang pasyon sa pag-alagad sa mga nag-ilaid sa kalisud nga katawhan nga walay bahid sa kurapsiyon ug pagpaka-aron-ingnon.
Sa matag pamilya, hinaut nga magpabilin ang atong pasyon sa paghigugma sa atong kapikas sa kinabuhi, ilabi na sa atong mga anak, ug uban nga kabanay. Mawagtang unta kanato ang pagkaibog sa uban, inay atong ipabati kanila ang nagdilaab natong gugma sa una pa natong panagkita.
Di unta mawala kanato ang pasyon sa pag-atiman sa atong mga anak, bisan pa man sa ilang gipakita nga batasan. Magpabilin unta kanato ang pagkamadasigon sa pagtudlo kanila nga mahimong maayong lungsuranon ug Kristyano sa ilang henerasyon.