NORTH COTABATO -- Gipasidunggan ang Kidapawan City isip usa sa lima ka mga local government unit (LGU) nga Best LGU Implementer sa tibuok Soccsksargen.
Ang pasidungog gipahigayon atol sa 1st Performance Challenge Fund sa Koronadal City, sumala ni city chief information officer Williamor Magbanua.
Ang pasidungog gibase sa unom ka mga kriterya sama sa Timeliness, Quality Management, Sustainability, Transparency, Fund Management, ug Innovation.
Ilawom sa pagdumala ni Mayor Joseph Evangelista, gikan 2011 hangtud 2018, nahimong epektibo ug han-ay ang implementasyon sa mga proyekto sa nagkadaiyang lugar sa dakbayan.
Sa maong mga katuigan, unom ka higayon nga nakadawat og insentibo ang LGU-Kidapawan nga nagkantidad og P18,900, 000 nga gipundo alang sa siyam ka mga sub-projects.
Apil niini ang pagpasemento sa 3 ka mga city roads, pagmuntar og lighting system, water system ug mga street lights.
“Pamatuod kini nga wala nagahunong ang LGU sa paghatag sa mga batakang serbisyo alang sa katawhan sa Kidapawan,” segun ni Mayor Evangelista.
Ilawom sa liderato ni Mayor Evangelista, tulo ka higayon nga gipasidunggan ang Kidapawan City sa Seal of Good Local Governance (SGLG) gikan sa Department of Interior and Local Government (DILG).
Niadtong 2016, nakadawat ang LGU og P3.4 milyon nga gigahin alang sa pagpanindot sa playground area sa City Plaza.
Mikabat usab og P2.4 milyonn ang gigahin aron pundohan ang pagmuntar og Water System Project, kon diin mokabat sa 2000 ka mga lumupyo sa mga barangay sa Malinan, San Isidro, Linangcob, Sto. Nino, Katipunan, Sikitan ug Gayola.
Napahayagan sab ang 21 ka kilometro nga highway nga nagasubay sa mga barangay sa Balindog, Paco, Binoligan, Amas ug Patadon.
Anaa sa 253 ka mga streetlights ang gimuntar ug anaa sa 57 porsiyento ang kasamtangang ginagamit ug napahayag na.
Ginamit nga pundo alang sa pagpasuga sa mga nag-unang kadalanan sa dakbayan ang insentibo nga anaa sa P5.1 milyon nga gihatag sa DILG niadtong 2018 human nga giila ang dakbayan sa ikatulong higayon isip Seal of Good Local Governance (SGLG).
Si Mayor Joseph Evangelista, nagpasalamat sa katawhan nga walay puas nga nisalig sa iyang liderato ug nisuporta sa mga programa ug proyekto nga gipatuman.
“Dili ta mohunong sa pagpalambo sa atong dakbayan. Salamat sa inyong walay hunong nga pagsuporta sa atong mga programa. Nanghinaut ako nga sa sunod pang mga higayon anaa gihapon kamo nagasuporta sa atong mga pangandoy nga mahimong progresibo ang dakbayan,” matud ni Mayor Evangelista. (Edgar E. Fuerzas)