‘Spray plane’ nitiurok

LAMBAYONG, Sultan Kudarat -- Naangol ang piloto sa spray plane nga nahagsa alas 5:14 sa buntag niadtong Lunes, Abril 15.

Giila ang piloto nga si Captain Edcel Juban Luciano kinsa molupyo sa Davao City.

Gibutyag ni Herman Luna, officer-in-charge Chief of Police sa Lambayong, nga nakadawat sila og taho sa spray plane nga Agcat Aircraft nga gipanag-iyahan sa Air Work Corporation sa Davao City nga nahagsa sa Barangay Sigayansa maong lungsod.

Sa imbestigasyon sa kapulisan, nasayran nga palupad na ang spray plane aron mangespray sa Delinanas Banana Plantation and Development Corporation sa Datu Abdullah Sangki, Maguindanao Province.

Apan nasayran nga tulo ka kilometro gikan sa paglupad sa eroplano kalit lang napalong ang makina ug nahagsa.

Mga sibilyan daling nitabang sa piloto ug gidala ngadto sa Evangelista Medical Clinic and Hospital sa Lambayong.

Apan pipila ka gutlo ang milabay, gibalhin dayon siya sa Davao Doctors Hospital sa Davao City.

Naugdaw ang spray plane tungod sa kakusog sa impak sa pagkahagsa niini sa kasagbutan nga bahin sa Barangay Sigayan.

Mga personahe sa Civil Aviation Authority of the Philippines padayon nga nag-imbestiga sa hitabo. (Edgar E. Fuerzas)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph