NAGPAHIMANGNO ang Land Transportation Office (LTO)-Davao sa mga pasahero nga di mosakay sa mga kulorom nga public utility vehicles (PUVs) sama sa pipila ka mga van nga walay igong permit ug prangkisa aron di maalaot ugaling dunay disgrasya.
Kini ang panawagan ni LTO-Davao director Gomer Dy ngadto sa mga pasahero kinsa manguli sa ilang tagsa-tagsa ka mga probinsya karong Semana Santa.
Sugod karong adlawa, dagsa na ang mga pasahero sa mga terminal sa bus, labi na sa Davao City Overland Transport Terminal (DCOTT) nga maoy nahimong sentro sa terminal sa Davao Region.
Gipanghiling sa mga personahe sa LTO-Davao ang kondisyon sa mga bus, mga van ug taxi, pinaagi sa pagpahimangno sa mga dryaber ug konduktor alang sa kaluwasan sa mga pasahero.
Una niini, gilusad sa LTO ang “Oplan Biyaheng Ayos” alang sa paghatag og giya sa mga pasahero karong Semana Santa. (Richy F. Nalagon)