STA. CRUZ, Davao del Sur -- Usa ka 28-anyos nga babaye ang nakahiagom og mga samad dinunggaban sa nagkadaiyang bahin sa lawas human giluba sa kanhi kapuyo, adlaw’ng Lunes.
Nahitabo ang insidente sa Rizal St., Brgy. Zone III, alas 8 sa buntag, Abril 15.
Si Captain Mary Grace Martinez, hepe sa kapulisan sa Sta. Cruz Municipal Police Station, nag-ila sa biktima nga si Roann Jelyn Baliwan Saplagio, lending collector nga taga Sitio Talisay, Brgy. Zone III sa lugar.
Gihulagway ni Martinez nga nagsakay og traysikel ang biktima apan gipara siya sa suspek nga si Ramil Gonzales Eblacas, 30, pintor nga taga Sitio Bitaug, Brgy. Zone IV.
Nahitabo ang panaglalis sa duha ug sanglit armado og mahait nga hinagiban ang suspek, giduslak niini sa makadaghang higayon ang lawas sa biktima.
Gisuwayan pa pagdala sa mirespondeng sakop sa Municipal Disaster Risk Reduction and Management Council ang biktima apan si Dr. Herbert Alesna nagdeklara kaniya nga way nay kinabuhi.
Hinuon, daling naglusad og hot pursuit operation ang kapulisan hinungdan sa pagkasikop sa suspek.
Gilantaw sa kapulisan nga selos ang nag-unang motibo sa duguong hitabo.
Ginasubay pa sa kapulisan unsay hinungdan sa pagselos sa suspek.