USA ka gi-dismiss nga pulis ang nasikop atol sa checkpoint sa dalan Plaridel sa Barangay Umapad, siyudad sa Mandaue kaganihang kadlawn sa Martes, Abril 17, human kini nakuhaan ug shabu ug gamit para suyop niini.
Ang nasikop giila nga si Rodrigo Francisco Morados, 38 anyos, minyo ug residente sa Purok Camote, Barangay Bong-ao, lungsod sa Valencia, Negros Oriental.
Si Morados usa ka kanhi pulis nga nag-ranggo og Police Officer 3 nga na-assign sa Provincial Public Safety Company (PPSC) sa lungsod Sibulan, Negros Oriental ug gi-dismiss gikan sa serbisyo niadtong tuig 2015.
Matud ni Police Colonel Julian Entoma, ang director sa Mandaue City Police Office, nga nasikop si Morados sa gipahigayon nga Comelec checkpoint ang mga sakop sa Opao Police Station nga pinanguluhan ni Police Captain Reyco Romaguera.
Giingon nga lulan si Morados sa usa ka taxi.
Sa dihang gisusi ang taxi nga gisakyan, giingon nga susama'g wala nahimutang ang suspetsado.
Kalit kini nga nigawas sa taxi, dayon adunay gilabay.
Dali kini gipugngan sa mga pulis og narekobre ang gilabay niini nga usa ka gamay nga sachet sa gidudahan nga shabu.
Atol sa body search, nasakmit sa mga pulis ang tulo ka aluminum foil ug usa ka lighter.
Matud ni Entoma nga niangkon si Morados nga gikan siya sa Duljo Fatima, naghithit og shabu ug padulong unta sa dakbayan sa Lapu-Lapu.
Nasuta sa mga pulis nga namaligya na usab kini og drugas sa ilang lugar sa Negros Oriental.
Kasamtangan nga napriso si Morados sa Opao Police Station sa siyudad sa Mandaue.