GIKOMPIRMAR sa kapulisan sa dakbayan sa Bogo nga adunay mga wa mailhing mga tawo ang nagsuroysuroy karon sa duha ka mga barangay sa ilang dakbayan.
Si Bogo City Police director Julian Entoma nipahibawo niini ngadto kang Mayor Celestino Martinez Jr. sa gipadala niyang komunikasyon nga gipetsahan niadtong Pebrero 4.
Matod ni Entoma nga ang wa mailhing mga tawo naa nagsuroysuroy sa Barangay Malingin ug Banban.
Nisaysay ang hepe sa kapulisan sa Bogo nga nagpahigayon siyag “personal familiarization” sa duha ka mga barangay panahon adlawan ug kagabhion unya nagpangutana siya kon aduna bay mga bag-ong nawong silang nakit-an sa ilang dapit ug napakisayod usab siya nga kon kining mga tawhana nanghulga ba kanila.
Way nikompirmar sa mga molupyo sa duha ka barangay sa presensya sa mga wa mailhing mga tawo apan may mga mag-uuma nga nihisgot nga di na bag-o kanila ang presensya sa mga bag-ong nawong nga magsuroy-suroy sa ilang dapit.
“Stating that these reports of new faces/persons in their area is not new to them but those who may actually saw are afraid to tell to the authorities,” nagkanayon si Entoma sa iyang report.
Subay niini, si Entoma nirekomendar sa presensya sa kapulisan ug mga sakop sa CBACTAF ngadto sa Banban ug Malingin. Anaa ang ilang presensya sugod sa gabii ngadto sa buntag ug mopahigayon usab silag checkpoint .
Giawhag usab niya ang mga opisyal sa barangay nga magmintinar og listahan sa ilang mga molupyo aron dali ra kini nga mailhan kon si kinsa ang mga bag-ong nawong sa ilang dapit.
Gikahimuot ni Kong. Benhur Salimbangon nga gikompirmar sa kapulisan ang presensya sa wa mailhing mga tawo sa duha ka barangay kay nihaum kini sa nabuhian na niyang pamahayag.
“The report is corroborative of the statements he previously released – that the presence of unidentified armed men is not a plain product of his speculation and conjecture,” matod ni Atty. Delon Urot, abogado ni Salimbangon.
Si Salimbangon namahayag nga di siya mosuporta sa rekomendasyon sa kapulisan kay di siya komportable nga ang CBACTAF mouban sa kapulisan sa operasyon kansang kataw-anan kini nunot sa awhag niya nga imbestigahon ang grupo kansang ilegal ang pagporma niini unya mokuyog sa mga awtoridad nga maoy gitahasan sa balaod.
“To allow the same to proceed would be inimical to our pursuit for genuine peaceful and honest elections in the City of Bogo,” dugang sa padayag ni Urot.