VILLABA, Leyte -- Tulo ang kompirmadong patay sa nahitabong ambush sa Barangay Tagbubunga, Villaba, Leyte, alas 4 Martes sa hapon, Abril 16.
Duha sa napatay jail guard sa Palompon Leyte Sub Provincial Jail ug usa ang sibilyan.
Giila ang mga nakalas nga sila si Leo Gonzales, taga Tabango Leyte, ug Genesis Piamonte, taga San Isidro Leyte, pulos jail guard. Ang sibilyan mao si Apolinario Escoton, taga Palompon, Leyte.
Luwas ang lima ka inmates nga sila Ramonito Tahanlangit, Ronnel Tahanlangit, Ronnie Pagatpat, Jeremy Dabacol ug Renan Dawaton.
Sakay og traysikol ang mga jail guard uban sa lima ka inmate gikan sa Villaba pauli sa Palompon.
Pag abot sa may pangpang sa Tagbubunga, gipamusil sa riding-in-tandem nga nakamaskara ang duha ka jail guard.
Naigo ang drayber sa traysikol nga si Escoton ug namatay.
Ang lima ka inmates nga nakaposas nag-iyahay sa paglukso gikan sa traysikol sa kahadlok nga mapagan.
Daghan ang nagtuo nga posibleng ang duha ka jail guard ang target kay way nakalas sa lima ka inmates.
Matud ni Police Corporal Ruel Buntis, giingong guba ang service vehicle sa Sub-Provincial Jail maong nag traysikol ra ang duha ka gwardiya ug lima ka inmates.
Giklaro sa kapulisan nga walay nakaeskapo nga inmates atol sa insidente.
“Gipangutana bitaw kuno sila nga maayo kay wa mo moeskapo? Ingon pud kuno ang mga inmates nga di mi mu eskapo kay kaayo sa amo kabutang,” matod ni Buntis.
Nihimo karon og follow up ang imbestigador sa Villaba Police Station uban sa ilang hepe Police Captain Ricky Rubillos.
Wala pa masayri ang motibo sa krimen ug wa pa usab mahibaw-i kung kinsa ang responsable.