Garcia: Maleldo 2019

“E ATA, ing katuliran

i Dimas ing mayap a tuldan

manangis ta’t manyambitan

ba’tang karin mipamisan

ketang manawa nang balayan.

King agya mang ing kaladwa

makasaut ya king sala

maba pa mang aldo ita

e sukat king minganib yng

mawad king pakalulu na.

King grasya ta makasaut

lakwan ing tuksung dururup

manimbulan ta king Krus

ba’tang dasan at ayabut

itang balaya’ning Dyos.

Iti ing tutung sintingan

lalung mal king lalung kamal

kanitang tangsung ubingan

kang Moyses a lelangan

karing Yebreos king misan.

Ninu ya man ing makeyat

king sanu mang e patawak

king tangsu karin ya marap

milako mipaid agad

itang masiring kamandag.

E ata iting katawan

karin mu manibatan ngan

ali na a sasakupan

itang king kaladwang bye

ning king taung kasalanan.

Ngeni bukud aliwa ya

ing sasakup keting sala

lunas yang tutung maula

yang babye kanawa-na

ning katawan at kaladwa.

Tikdo tiktuk dang ubingan

kamamalung kamandagan

dumurup paulu ta ngan

kanining tau a sakdal

ari banwa’t sikluban.

Lawan ye’t paka-paku la

ding gamat ampong bitis na

king krus anyu makabpa

manayang kaula’na la

ding bisang dumurup keya.

Kingkekatamuing pamanurup

kening masinta’t malugud

lwa, ing yain ibugnus

ba’na katang ike ilub

ketang masinup nang bakud.

Mababang-mababang lub na

bang e ta minganib keya

lan ye’t niyu pepamura

piyaku nang sablang lasa,

uli ning king taung sala.

Lumalu kasi kanitang

Dimas a sadsad newangan

lusuk ya king karawalan

king pamanyawad na misan

agad neng pepatawaran.

O pati-pating mapalad

babaing lalu karing lat

Mariyang kasindak-sindak

salu na magmung miwalak

makauli king Mesiyas.

Ketang pamikawani ra

deti nang Indung adwa

ketang kalye amargura

dit man alang kapawi na

ning maragul a lungkut na.

Agyang tutukya’ne man

i Yesus ning Biren a mal

melaglag ya rin king dalan

uli ning lumbe na’t sukal

parati yang kapapatdan.

E makalakal a dusa

ing king Indung mangulila

inya ta’t pesituki la

deta ning babai keying

menibat king Galileya.

Pangaras na king Kalbaryo

ning Indung pakakalulu

a mata’ne Yesukristo

makapaku ne ping tutu

kanitang Sakromadero.

Telanga’na neng lepitan

nining Indung misnang lumbe

pusu na magmung matuno

anti naman i San Juan

mangingisnawang malalam.

Dakal a mibuntu-buntung

tangis ning Biren a Ginu

king mal a Divino Verbo

karin king pu’ning madero

maglunus pakakalulu.

Meyumil ing lub na’t isip

dila e na apagsulit

uli ning tutung masakit

dapot, ali na aligpit

anti kening keyang tangis.

O pakamalan kung bunga

bye na nining kaladwa!

baket bungsu mekanyan ka?

iti sukat nang abata

nindu mung lalawe keka?

Nanu ta, nanu bungsu ku

nanu ngan tang depatan mung

e makabili king tutu

kaniting kinyan da kayung

pepasakitan ding lilu?

E na kaya ikaramag

ing anti kaniti bayat?

at insang pusu nang masyas

ning Indu e manga-yagas

king lasa ning keang anak?

Aku pa mo kaya ita

ing ngeni e mabalisa

Yesus ko nung lawan da ka

magmung makwa ing inawa

mumusig pati kaladwa.

Ika rin ikang tiwase

ing kaladwa ku at bye

Dyos a alang kapante

a keyang penganinawan

ning mabilug a sikluban.

Pantigan me waring mata

indu mung mangulila

ani ka tatalanga’na

king makayubu nang sinta

tatambal na pang lwa na.

Tanggapan mu e man dapat

bungso ing kakung pagsalbat

balu mu ring matalastas

ing lugud na kekang ganap

nindu mung mibabad sindak!

~Mapilang sunis king

“Mal a Pasyon ning Ginu Tang Yesukristo”

nang Cornelio A. Pabalan y Byron

Maligaya at mapamasalang Paruminggu ning Maleldo, Kabalen!

Dake Talabaldugan:

1. giwà – (palagyu) kulayung malutu bagyus. English: red owl. Alimbawa king pamangamit: “Tiliran ne ning giwa itang mebuktut a dalaga king kangatbang barangay inya e la petugut keng indredus da reng mangalabit a siping bale.”

2. gubat – (palagyu) kakewan, kasukalan, masukal. English: forest, jungle, woods or woodland. Alimbawa king pamangamit: “Nung e ka bisang maket ubingan o masagpang lasip, e na ka mu pupunta pa keng gubat, nung ali bala pentun mu ing kaplas mung balat.”

3. guwáng – (palagyu) kalubkuban, alang laman. English: hollow or empty inside. Alimbawa king pamangamit: “Deng taung paratut at pane kaynge siguradung guwang la buntuk.”

4. gukgók/gukgúk¹ – (palagyu) gikgik ding babi. English: grunt of pigs. Alimbawa king pamangamit: “Mengapagising la reng misiping-siping bale keng gukguk da reng bayung bait a bigak keng mula da ri Osyang inya asne rugu karine karela.”

5. gukgók/gukgúk² – (palagyu) galukguk ning dungus. English: sound in the stomach during the digestion process or when one is hungry. Alimbawa king pamangamit: “Neng makasakab ya keng atsan ku ing bingut kung anak, mangapakayli ya neng darandaman na ing gukguk da ring dungus at bituka ku.”

***

Gawing Mekalingwan Karing Kapampangan

Ketang milabas deng Kapampangan--lalu na reng mangatwa--mangiling la keng pamamangan karni neng Maleldo at dagdag kaniti ing e pamamangan daretsa at miminum la mung danum. Apibabata da iti uling masikan la kasalpantayanan at pamipaulaga king pamanyuyu da king Apung Ginu. Ngening kasalukuyan--nung atin mang darapat kaniti—mapilan na lamu at dakal ing e da na agawa itang danum mu ing karelang inuman at ala na lang aliwa pang kakanan ditak man. Ikit ku iti karing apu ku’t pengari.

***

Pamipalino: Ing Kapisik magnasa ya at manwalang misubling pasibayu ing lagablab ning legwan ning Kalinangan Kapampangan kapamilatan ding keyang dalit, kawatasan, amlat at miyayaliwang kapaglalangan-panyulat a misulat king pigmulan at tune kulitan kambe ning dalise at mapagmasabal a pamisip at parasan. Ing panyulat ding pipumpunan yang sukat mataluki at miparangalan kapamilatan ning pamangamit kareti at aliwa ring karing dayu at salungat a paralan dang dela keti Kapampangan. Ing Kapisik ala yang kikilingan a kapanaligan, aguman o ninu man nung e ing Lubusang Katutwan.

Malyaring sumulat king garciakragi@yahoo.com para karing kutang o munikala.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph