HUMAN sa tulo ka adlaw nga pakigbugno sa kamatayon, namatay ang usa ka tinun-ang naligsan og ambulansya samtang nitambong sa parada sa pag-abri sa Musikahan Festival sa siyudad sa Tagum niadtong Biyernes sa hapon.
Pasado alas 2:00 sa hapon niadtong Lunes, hingkabsan sa iyang kinabuhi si Mario Dumadapat, ug tinun-an sa Academia de Davao.
Ang biktima gikatahong naligsan sa usa ka ambulansya sa LGU- Monkayo nga dunay plate number SEN 905 ug gidrayban sa usa ka Wendell Silverio didto sa may Apokon Road, dakbayan sa Tagum.
Ang ambulansya naghatud og pasyente sa Davao Regional Hospital sa Barangay Apokon, sa siyudad.
Ang biktima mitabong sa parada uban ang liboan ka mga tinun-an sa dakbayan sa Tagum kabahin sa pag-abri sa Musikahan Festival.
Ang biktima nahiagum og mga pangos ug bun-og ug samad sa kalawasan ug gisuwayan pa og dala sa ospital.
Apan nakutluan sa iyang kinabuhi kini samtang giatiman sa mga doktor.
Ang drayber sa ambulansya gikustudiya na sa kapulisan samtang kasong reckless imprudence resulting to homicide giandam na batok sa suspek. (Marvin Pineda)