BISAN kon na-admit sa Talisay District Hospital si Allyza Marie Tecson, iya gihapong gibuhat ang mga project sa ilang tunghaan.
Ang 18 anyos nga dalaga nitapos sa Grade 12 with high honors sa Asian College of Technology (ACT) Bulacao campus, siyudad sa Talisay.
Apan inay siya ang modawat sa iyang medalya, ang iyang amahan nga si Arturo "Art" Tecson Jr., 41, ang nisaka sa entablado ug nipaso atol sa ilang graduation niadtong Abril 4, 2019 sa ACT main campus sa dakbayan sa Sugbo.
Si Allyza namatay sa dengue fever dul-an tulo ka semana sa wa pa ang ilang graduation. Siya ang kamaguwangan sa lima ka magsuon, kinsa nangandoy mahimong flight attendant.
Si Art nagsige na og hilak samtang nagtan-aw sa anak nga gi-revive sa mga doktor sa Chong Hua Hospital, Cebu City, pinaagi sa video chat.
“Last nako nakit-an siya was gi-revive siya. Kaduha nana siya (gi-revive) kay pirmero ana didto sa Talisay unya nilaban man siya kay sige man ko sulti niya, please, Anak, laban, please laban. Mouli pa si Papa, ayaw papilde. Naminaw pa siya nako, mohilak pa gani to siya pagsulti nako.
Niana akong niece, “Uncle, naminaw siya nimo kay nakahilak man siya,” sugilon ni Art sa Superbalita Cebu niadtong Lunes, Abril 15.
Si Art sa maong pagkahitabo tua sa Riyadh, Saudi Arabia, diin siya nagtrabaho isip usa ka surveyor sa usa ka kompaniya og telekomunikasyon.
Katapusan niyang nakauban si Allyza sa debut party niini niadtong Nobiyembre 6, 2018 ug pagka Disyembre 30 nibalik kini sa Riyadh.
Matod ni Art, tulo ka adlaw nga gihilantan si Allyza ug human kini nagpahiling sa doktor, nakompirmar nga dengue.
Sa wala pa ma-admit sa TDH niadtong Marso 12, nagka-video call pa silang duha ug iyang gikumusta sa kahimtang niini diin nagtiwas pa kini sa project sa ilang grupo.
“Not knowing, that was the last time nga mosulti diay siya nako nga, “sige Pa, mo-rest na ko” kay kapoy na kuno kaayo siya. Giduka na siya. “I’m very sleepy na, Pa. Matulog nako ha,”” saysay ni Art, kinsa nisulti na sa anak nga pagka-ugma na tiwason ang gitrabaho nga project.
“Imagine, naa na siya sa hospital, nag-aagaw buhay, she managed to send a file para ma- complete lang ang project sa ilang grupo.
Pursigido siya sa iyang studies ba. Makumpleto nga dili maapil ang iyang classmates ba nga mapahiya sila.” Niadtong Marso 13, na-admit sa TDH si Allyza, kinsa iyang gihulagway nga intelihente, matinahuron, responsabli, mapinanggaon, ug buotan, nga anak ug maguwang.
Apan human sa duha ka adlaw, nabugtoan sa kinabuhi si Allyza.
HINILAKAY SA GRADUATION
Atol sa seremonyas sa graduation sa anak, nagpugong unta si Art nga di mohilak sa dayon saka padung sa ibabaw sa stage aron modawat sa medalya ni Allyza, kay dili siya gusto nga maguba ang selebrasyon sa ubang graduates.
Apan ang iyang maguwang nga babaye nga si Maureen Tecson-Dakay, gipuy-an ni Allyza, nga nitambag niya nga dili mohilak sa stage, mao na nuon ang unang nihilak samtang siya naglinya pa.
Nakahilak na usab siya og sugod sa dayon saka sa stage dihang nakita niya nga nanghilak ang mga magtutudlo ug classmates sa iyang anak samtang ang uban namakpak ug ni-cheer niya.
“I was so happy. I was so relieved. Anak, daghan kaayo ni-support nato. This ones for you, anak! I will be strong. Papa will be brave just for you, just help me," sulti ni Art samtang gitudlo sa ibabaw ang tuong kamot ug gitaod sa founder sa ACT nga si Congressman Rodrigo Abellanosa ang medalya ngadto niya.
Unang nagtuo si Art, lumad nga taga dakbayan sa Tacloban ang pamilya, nga ang bagyong Yolanda niadtong Nobiyembre 2013, ang labing dako nga pagsuway sa ilang pamilya.
Apan aduna pa diay mas dako niini, ang pagkamatay ni Allyza ug sa manghod niini.
Duha ka tuig ang nakalabay, namatay sa sepsis ang laing anak ni Art, si Ariza Artheena, kinsa 6 anyos.
DENGUE MIDAGHAN
Usa ka 9-buwan nga bata nga gikan sa lungsod sa Argao padayon karong gi-verify sa Department of Health (DOH) 7 nga usa sa nakalas na niining nagkasaka nga mga kaso sa dengue sa Central Visayas.
Sa datus sa Regional Epidemiology and Surveillance Unit nga anaa na sa 6,521 ka kaso sa Dengue sukad Enero hangtod Abril 6 diin anaa na sa 38 ang patay.
Ang ika-38 nga patay mao kining 27-anyos nga lalake gikan sa lungsod sa Borbon. Nag-una gihapon ang Central Visayas nga aduna’y labing daghang kaso sa dengue sa nasod. (SCG/ dugang taho ni HBL)