USA ka menor de edad kritikal ang kahimtang karon sulod sa ospital human gipusil sa wa mailhing mga tawo nga lulan sa motorsiklo didto sa Purok 5, Barangay San Francisco, dakbayan sa Panabo.

Giila ang biktima nga mao si alyas Mark, 17, ug molupyo sa Liceralde Subdivision, Barangay San Francisco, sa siyudad.

Matud sa report gikan sa Panabo City Police Station nga nahitabo ang pagpamusil pasado ala 1:00 sa kaadlawon niadtong Dominggo.

Sakay sa usa ka single motor ang biktima uban ang mga higala ug pauli na unta sa ilang balay.

Pag-abot sa Purok 5 mihangyo ang biktima sa drayber sa motor nga mohunong kadiyot kay mopalit siya og sigarilyo.

Apan sa human sa pagpalit, ang biktima kalit lamang gipusil sa duha ka wa mailhing mga suspetsado nga nakasakay sa motor gamit ang wa pa matinong kalibre sa armas.

Ang biktima nakahiagum og samad pinusilan sa kalawasan ug daling gidala sa ospital.

Mga suspek abtik nga misisbat padulong sa wa matinong lugar human sa hitabo.

Ang kapulisan mihimo na karon og dugang imbistigasyon aron sayron ang motibo ug suspek sa pagpamusil. (Marvin Pineda)