Lariosa: Mga kiriwan nanglangsad

DI UNTA angayng isulti. Apan makapikal nga hunahunaon nga mga kiriwan nanglangsad aron papili sa umaabot nga eleksiyon. Ilaron lang nila ang lungsod.

Uban kanila wa pay mga kaso, apan naputos sa mga libak gikan sa nahibawo. Ang pipila gitaral na sa hukmanan apan wa pa makumbikto’

Karong bag-o, gi-endosar ni Pamuno Duterte sila Jingoy Estrada ug Imee Marcos. Nakagawas gikan sa prisuhan kini si Estrada kay nakapiyansa.

Si Imee wa pa kamansahig kaso, apan anak ni kanhi Pamuno Marcos nga gawas diktador nakasakiyo sa panudlanan sa nasod nga gibana-bana nga 34 bilyon ka pesos.

Kahibudgan nganong gi-endorsar ni Digong si Estrada nga apil man kini sa pork barrel scam. Sila si Ramon Revilla, Jr. ug Juan Ponce Enrile nanagan sad.

Kining tulo, matod pa, di gyud mauwaw nga klaro man kaayo nga apil sila sa scam. Si Revilla naabsuwelto, pero nauyog ang hukom sa kasuko sa katawhan.

Si Enrile, makagaba. Kay bisan tiguwang na kaayo magpapili pa gyud. Matod ni anhing Talyux Bacalso kining tiguwang di na angay mag-apil-apil sa pulitika kay mapandol na lang gani sa luwa sa kabayo.

Apan lagi gusto man siya gihapon nga makagunit og gahom. Nakabawi na unta ni si Enrile sa iyang maayong pagda sa impeachment trial ni Renato Corona kalit natiklaob sa pork baril scam.

Kitang katawhan magmatino na unta sa pagpili sa atong mga lider, nakita sa survey nga sila si Revilla ug Estrada nakasud sa magic 12. Sa ato pa, ang mga tawo nalimot sa scam.

Pastilan di gyud ta kasabot nganong ingon ani ang paminsar sa katawhan. Morag namahala na lang sila sa ilang kaugalingong umaabot.

Husto tong giingon sa usa ka political analyst nga kita angay ning matang sa atong kalisod karon kay namili tag mga lider nga ila lang bulsa ang giatiman.

Morag guba tang plaka niini nga kanunayng magbalikbalik sa pagpahinmdom nga atong pilion ang tarong ug buotan nga tawo nga mahadlukon pagbuhat og kahiwian.

Di sad ta makasabot ni Digong gukuron gyud kuno niya ang mga kurakot. Apan pabor sa mga tawong giila nga kurakot. Mora hinuon siyag naghabwa-puno ning kahimtanga.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph