Editoryal: Tingbiyahe

Editorial cartoon by Elton Mike Solaño
Editorial cartoon by Elton Mike Solaño

GOOD LUCK. Luwas nga pagbiyahe sa tanan. Karong adlawa, Abril 17, gipaabot nga magsugod sa pagdagsa ang daghang pasahero sa bisan asang terminal sama sa bus, v-hires, airport ug pantalan human kadaghanan sa mga buhatan o kompaniya abli lang kutob sa udto ning adlawa, Miyerkules Santo, aron paghatag og higayon sa ilang mga trabahante nga makaandam sa biyahe tungod sa taas nga bakasyon sa Semana Santa.

Si Jonathan Tumulak, focal person on traffic management sa Kapitolyo, nipasidaan nga tulo ngadto sa upat ka oras ang kahuot sa dagan sa trapiko nga masinati sa mga sakyanan nga mobiyahe paingon sa habagatang Sugbo sa Biyernes Santo, Abril 19, ug Dominggo sa Pagkabanhaw, Abril 21, tungod sa duha ka dagkong mga kalihokan sa mga lungsod sa San Fernando ug Minglanilla.

Sa Biyernes Santo himuon sa San Fernando ang dakong prosesyon sa San Isidro Labrador Parish nga magsugod sa alas 6:00 sa gabii, human sa misa, diin maapektuhan ang mga dan sa national highway.

Samtang, sa Dominggo sa Pagkabanhaw, ipahigayon usab sa Minglanilla ang Kabanhawan Festival nga salmotan sa 10 ka contingents gikan sa lainlaing mga tunghaan ug barangay.

Padulong sa norte nga bahin sa lalawigan, naandan nga mosubwak usab ang biyahe tungod sa daghang bakasyonista nga moadto sa mga maanindot nga beach resorts sa isla sa Bantayan, sa Malapascua ug ubang bahin sa norte.

Si Tumulak nihangyo sa publiko nga magpundo lang kon way mahinungdanon nga lakaw o biyahe, mogikan og sayo aron di matanggong sa trapik.

Susama gihapon ang tambag alang sa magdala og pribadong sakyanan, ang trapik mobalhin sa probinsiya sugod ning adlawa. Dugang pasidaan, susihan ang kaluwasan sa inyong sakyanan alang sa taas nga biyahe. Pahinumdom, di karon bakasyon sa paglingawlingaw apan panahon sa pagpenetensiya ug pagbag-o.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph