HUMAN miguwa ang isyu nga nakighigala sa mga rebeldeng New People's Army (NPA) si Mayor Rodrigo Duterte, mitubag na ang mayor pinaagi sa pagsulti nga pantay ang iyang pagtagad sa tanan nga ania sa siyudad sa Davao.

"I am fair to everybody. Ako naa sa gobyerno. Kung mag-engkwentro sila, ila na! Wala koy gipaboran dinhi," ni Duterte dihang gihinabi sa mga tigabalita sa City Hall niadtong Lunes.

Si Duterte nagpasabot nga walay dautan sa iyang gihimo sanglit iya lamang gipakita ang kaayo ngadto sa tanang mga tawo nga moduol kaniya.

Pipila ka sektor sama sa kabataan, babayen-an, senior citizen, Muslim, ug militanteng pundok nga nahinabi sa Superbalita nagpahayag nga husto ang Mayor sanglit ila kining natagamtaman diin gihatagan sila og importansiya.

Ang mayor unang gisaway sa iyang mga kritiko nga wala siyay gihimo sa pagsanta sa mga rebeldeng NPA.

Unang misaway sa mayor mao sila Bantay Partylist representative Jovito Palparan ug Anad partylist representative Jun Alcover.

Ang duha ka mga kongresista nagbutyag sa programa sa radyo ug mantalaan nga misiaw ang mga rebelde sanglit wala sila gipitol sa Mayor.

Suma nila gihatagan sa Mayor ang mga rebelde og espesyal nga pagtagad sama sa pagpanghatag og mga botas, bugas, lechon ug uban pang kinahanglanon nila Kumander Parago.

Gawas pa niini, gihatagan sab sa mayor og kahigayonan nga magpapili ang mga progresibong pundok sama nila Joel Virador ug Ariel Casilao sa Bayan Muna nga mikandidato pagka-konsehal karong umaabot nga eleksiyon.

Ang gihimo sa mayor gidayeg sa mga progresibong pundok sanglit alang kanila, ilang nakita ang tinuod nga demokrasya diin gawasnon silang makapadayag sa ilang sentimento sa gobyerno dinhi sa siyudad ilawom sa administrasyon ni Mayor Duterte. (AD)