DOSE anyos nga dalagita gisuwayan paglugos sa usa ka wa mailhing lalake sa lungsod sa Badian, Sugbo, apan wa mahinayon kay wala mogahi ang kinatawo.
Naglakaw ang dalagita sa usa ka kawayanan niadtong Biyernes, pasado alas 6 sa gabii sa Barangay Kansanto, Badian, dihang gibira siya sa lalake.
Gisugo si Annie (di tinuod niyang ngan), sa iyang inahan sa pagpalit og ice sa tindahan layo sa ilang balay.
Apan sa pag-abot sa kawayanan, kalit siya nga gibira sa usa ka wala mailhing lalake nga nagtaptap sa nawong. Gidala siya sa kilid sa kawayanan ug gisampongan ang iyang baba ug gihuboan sa shorts.
Natingala si Annie nga nagsigi na lang og inat sa iyang kinatawo ang lalake tungod kay wa mogahi.
Dinhi nakahigayon sa paglighot si Annie ug nidagan pauli sa ilang balay,
Iya dayon nga gitug-an sa iyang mga ginikanan ang hitabo.
Dali silang niadto sa dapit diin didto gisuwayan paglugos ang biktima, apan wa na nila maabti ang lalake.
“Ang estorya sa bata is naghubo kuno nang suspek nya diri na sa ubos ang pantalon. Giaksyonan na gyud unta nya gihikap-hikap ra man daw niya ang kinatawo. Mao to naka higayon siyag dagan,” asoy ni Police Lieutenant Revelito Tadique Dugang ni Tadique, hepe sa Badian police station, nga nag padayon ang ilang imbestigasyon.
Way nakita si Annie nga timailhan sa lawas sa lalake aron unta makatumbok sila kon kinsa.
Niadtong Sabado, nakakita ang dalagita ug inikanan nga usa ka lalake nga nag-inom og tuba sa merkado sa Badian nga ilang gituohan nga maoy suspek.
Gipatawag ni Tadique ang maong lalake sa police station aron imbestigahon, apan gipapauli ra usab tungod kay wa silay ebidensya ug nag-usab-usab na ang pamahayag sa biktima.
ATTEMPTED RAPE
Samtang, 45 anyos nga habal-habal driver sa sitio Capakulan, Barangay Tisa, Dakbayan sa Sugbo gidakop human gipasanginlan nga nanghinol sa kinatawo sa usa ka 5 anyos nga batang babaye niadtong Lunes sa hapon, Abril 15.
Si Police Staff Sergeant Merlinda Ferrer sa Labangon police station nagkanayon nga ang bata nitug-an sa amigo sa iyang kuya nga gihikap iyang kinatawo sa ilang gilingan.
Giila ang suspek nga si Romil Lauron dela Cerna, silingan ra usab sa biktima.
Giingong gitagaan siyag P2 ni de la Cerna aron mopalit og juice. Sa iyang pagbalik, gipasulod siya sa balay sa suspek ug didto na giingong gihinol ang iyang kinatawo.
“Kining bata naa ra ni sa balay dayon miduol niya kining suspek. Gitagaan siyag duha ka piso. After gitagaan og duha ka piso, mipalit og juice ang bata. Human gipasulod daw siya sa balay. Pagsulod sa balay, gibaba siya human didto na gihikap iyang kinatawo,” asoy ni Ferrer.
Apan hugot gipanghimakak ni de la Cerna nga iyang gihinol ang bata.
Gihulagway ni Ferrer ang bata nga na trauma tungod kay hangtod sa pagsuwat ning balita, nagkurog-kurog pa kini.
Kasong kalapasan sa Section 5 sa Republic Act 7610, kun Anti-Child Abuse Law, sexual abuse of minor ang atubangon sa suspek. (B)