USA ka habal-habal drayber ang gipatay sa wala mailhing mamumuno samtang gipatuman sa kapulisan ang Comelec gun ban sa alas 8:30 sa buntag kagahapon atubangan sa Mintal Public Market, Barangay Mintal, distrito sa Tugbok, siyudad sa Davao.

Ang mamumuno walay kahadlok nga mihimo sa krimen sulod sa mga 300 metros ang gilay-on gikan sa Tugbok Police Station.

Ang biktima giila sa kapulisan nga mao si Randy Vosotros, 41, dunay live-in partner, habal-habal drayber ug nagpuyo Barangay Tugbok Proper.

Base sa spot report sa Tugok Police Station, nagpaabot ang biktima og pasahero niadtong orasa sa maong lugar apan kalit siyang giduol sa usa ka tawo nga nagbit-bit og armas dayon gipusil sa makadaghan nga higayon.

Mga nakasaksi sa maong hitabo nagbutyag nga gikan sa pikas tampi sa kalsada ang mamumuno ug walay daghang pangutana gipusil ang biktima tumong sa iyang walang bahin sa lawas.

Human sa maong hitabo, suma sa imbestigasyon, daling mibiya ang mamumuno sakay sa usa ka motorsiklo nga kolor blue paingon ngadto sa wala masayri nga lugar.

Ang mamumuno gilarawan nga nagpandiron og 30 anyos, lima ka tiil ug upat ka pulgada ang gitas-on, dunay tatoo sa iyang tuong bukton ug abaga.

Nahipus sa mga pulis nga miresponde sa maong hitabo ang usa ka Kymko nga motorsiklo ug lima ka basiyo sa bala sa .45 kalibre nga pistola nga maoy gigamit sa mamumuno.

Ang patay'ng lawas sa biktima atua gihaya sa Angel Funeral Homes sa Calinan.

"So far, our investigators are still conducting a follow-up investigation to identify the suspect. Dili pa mahibaloan kung kinsa ang suspect kay wala man gud nakuha ang plate number sa gate away motorcycle," ni Police Inspector Rogelio Rellente sa Superbalita dihang gihinabi sa telepono. (AD)