CATBALOGAN CITY, Samar-- Gatosan ka drayber ang gipaubos sa surprise drug test sa Philippine Drug Enforcement Agency (PDEA) Eastern Visayas uban sa kapulisan ug mga sangay sa gobyerno, Lunes, Abril 15.
Sa gipang drug test, usa ang nag positibo sa pag gamit og ilegal nga drugas.
Matod sa PDEA- Eastern Visayas, gipahigayon ang surprise drug test sa Catbalogan ug Tacloban City Transport Terminals.
Kini maylabot sa lakang sa PDEA nga luwas sa ilegal nga droga ang rehiyon niining paghandom sa Semana Santa.
Gikauban sa PDEA ang kapulisan sa Catbalogan ug Tacloban, Department of Health, local government unit Catbalogan ug Tacloban, Land Transportation Office ug Land Transportation Franchising and Regulatory Board.
Base sa datos sa PDEA- Eastern Visayas, 52 ka bus drivers, 46 ka konduktor ug 2 ka dispatchers ang gipaubos sa drug test sa Robinsons Transport Terminal sa Tacloban.
Samtang 85 ka bus drivers, 17 ka konduktor ug 13 ka kawani sa Abucay Transport Terminal sa Tacloban ang gipaubos usab sa drug test.
Negatibo ang resulta sa gihimong drug test sa siyudad sa Tacloban.
Sa siyudad sa Catbalogan, Samar, 112 ka drivers ug 3 ka konduktor ang gipaubos sa surprise drug test.
Usa niini ang nag positibo sa paggamit og ilegal nga drugas.
Ang maong aktibidad giimplementar sa mga terminal, pantalan ug airports lukop nasud ning Semana Santa.
Gitawag kini sa PDEA og Oplan Huli Week.
Subay niini, ang Police Regional Office (PRO) Eastern Visayas, milusad na usab sa ilang anti-criminality campaign ning summer.
Gitawag kini og Oplan SumVac (Summer Vacation), diin si PRO- Eastern Visayas Director Police Brigadier General Dionardo Carlos mimando sa tanan pulis nga naa gyod sa mga pampublikong lugar.
Hilabi na ang mga vital installations sama sa mga bangko, pantalan, airport, terminal ug mga mall.
Ang mga pulis nga naa sa mga karsada nanghatag usab og mga flyers nga dunay tips paglikay sa krimen ug dunay mga gipanghatag nga hotline numbers.
Gisiguro sa kapulisan sa Eastern Visayas nga dili mo lampos ang bisan kinsang dunay dautang tuyo.
Gihangyo usab sa kapulisan ang publiko sa pag cooperate aron magmahimong malinawon ang Semana Santa ingon man ang summer vacation. (JKDP)