USA ka pasahero sa traysikad ang gipusil sa Sitio Wangyu Alaska, Barangay Mambaling, siyudad sa Sugbo, alas 8:00 sa miaging gabii.
Ang biktima mao si Arasteo Villanueva, 37, usa ka shellcraft worker nga taga Sitio Pungtod sa samang dapit, nakaangkon og duha ka mga samad sa bukobuko hinungdan sa iyang hinanaling kamatayon.
Sa pasiunang imbestigasyon ni SPO3 Rey Cuyos sa Homicide Section, gikan pa sa trabaho ang biktima ug nagsakay kini og traysikad paingon sa ilang balay.
Apan giatangan kini sa usa ka tawo daplin sa dalan ug igo lang nakatalikod ang biktima gipusil kini makaduha ka higayon.
Bisan pa man og samaran Villanueva, dali siyang nilayat sa traysikad ug nidagan sa pamasin nga makapalayo sa suspek apan pipila ka metros ang gilay-on, nahagba ang biktima ug ang suspek daling nakabiya sa dapit.
Sa imbestigasyon sa kapolisan sa dapit, ang mga tawo nga nagpuyo sa dapit pulos nangambot.
Way nanug-an kon si kinsa ang nagpusil sa biktima.
Duha ka slug sa bala ang napalgan sa kapolisan sa dapit nga nahitabo-an.
Dugang nasayran sa kapolisan gikan kang Miraluna Peca, ang kaipon sa biktima, nga nakada-wat sila og hulga human gipusil-patay ang ilang silingan sa milabayng buwan sa Oktubre sa miaging tuig.
Ang ilang silingan gipusil samtang diha kini sa hantakan ug gikataho nga kini gibantayan sa biktima.