FRED FUENTES MONTERNEL
Lorega Proper, Cebu City
NING buntaga sa Sabado Santo maoy naabtan ni Pedot ang daghang nangaligo sa halapad nga linaw sa tinubdan sa Kandangas, nga gi-semento ang luwang ug matag daplin niini, nga naporma og morag lapad nga ‘swimming pool’ sa baryo. Kining bul-og nga tinubdan sa Kandangas mao ang gikuhaan og suplay sa tubig sa kasikbit nga mga baryo, ilabi na nga nahubsan na ang mga atabay sa tubig lakip na ang kasapaan tungod sa naglagiting nga kainit sa kuwaresma. Dili gayud kahubsan og tubig ang dakong linaw sa Kandangas tungod sa way pagkutat nga bul-og sa tubig sa tinubdan.
Maoy nabatasan sa probinsiya, ilabi na sa tanang mga baryo nga inigka Sabado Santo mao ang panahon sa pagpangaligo sa linaw sa tinubdan, sa mga ‘swimming pool’ ug sa mga ‘beach resort’ sa mga baybayon. Mag-ambahan ang tanan sa pagpangaligo inig Sabado Santo sa gitawag nila nga panhon sa gisong o tingkaligo. Lahi sa siyudad, kay ang panahon sa gisong mao man ang adlawng Dominggo, ang kasaulogan sa pagkabanhaw sa atong Ginuong Hesus.
“Dot, dali na! Tugsaw na dire sa tin-aw ug bugnawng tubig sa linaw!” ni Antoy nga nagpangamay, Suod niyang silingan ug katalirungan nga amigo si Antoy ug klasmeyt niya sa ‘senior high school’ sa ilang baryo.
“Gisong na ta, Dot! Ligo na aron inat-inaton nato ang piyarat tang ilong aron kini motaliwtiw!” Nagtingsi si Pulok nga miinat-inat sa pislat niyang ilong nga nahumol sa tubig, laing klasmeyt ni Pedot nga bisan 19 na ang edad naa gihapon sa senior high school.
Igo lang mipahiyom si Pedot. Sa atbang nga daplin sa sementadong linaw nga kaliguanan, nalantawan niya si Minda, anak nga kinamanghuran sa barangay kapitan sa ilang baryo. Uban ni Minda ang laing mga klasmeyt ug silingang dalaga, sila Susan ug Lina. Si Minda hilom nga gikaibgan ni Pedot, apan igo lang siya sa ‘ligaw-tingin’ sa dalaga sa ilang eskuylahan. Sa hilom nasabot usab ni Pedot nga may kaibog sab si Minda kaniya, ilabi na kay siya ang nag-una sa ‘honor roll’ sa ilang klase. Apan nagpugong lang si Pedot sa pagpanguyab, kay maoy pahimangno sa iyang Papa ug Mama nga dili una manguyab samtang di pa makatapos pag-eskuyla sa kolehiyo, kay bugtong siyang anak.
Mitimpasaw si Pedot sa tubig sa linaw ug paspas nga milangoy paingon sa nahimutangan ni Minda sa tungang bahin sa linaw. Sila si Susan ug Lina nanglangoy sab paingon nilang Antoy ug Pulok.
“Malipayong gisong, Min!” ni Pedot nga misikit kang Minda.
“Malipayong gisong sab nimo, Dot!” ni Minda nga nagpahiyom.
“Ning adlaw sa gisong, Min, karon lang gyud ko makabaton og kaisog sa pagsulti nimo sa tinuod. I love you, Min! Ikaw ang akong inspirasyon!” ni Pedot nga mitutok kang Minda.
“Hmmm! Hagbay ra kong naghulat nga modiga ka, Dot! I love you, too!” ni Minda nga wa motukol dihang miagbay kaniya si Pedot.
Nabatyagan ni Pedot nga daw may mga pako nga mikapakapa sulod sa iyang dughan niadtong orasa sa gisong sa Sabado Santo. Di matukib ang iyang kalipay nga nagkasinabtanay na gyud silang duha si Minda. Hugot silang nagtinutokay. Kon wa pay daghang tawo nga nangaligo, gikupogan nag halok ni Pedot si Minda. (KATAPUSAN)