BUOT masiguro ni Lapu-Lapu City Mayor Paz Radaza nga matunol ang P1 million nga reward money niadtong tawo nga dakog nakatampo sa kasulbaran sa linuog nga kamatayon ni Christine Lee Silawan.
Gipaabot pa hinuon ang resolution gikan sa buhatan sa Piskaliya sa kasong gisang-at sa Lapu-Lapu City Police Office batok ngadto ni Renato Llenes, 43 ug ang kadtong na-unang suspek nga nasikop sa National Bureau of Investigation (NBI) ug hain sa duha ang tinuod nga suspek sigun unya sa pagtimbang-timbang sa mga nakuhang ebidensiya.
Mipasalig si Radaza nga human sila misaad nga mohatag og reward money ila kining tumanon, taliwala sa nanggawas nga negatibo nga komento sa publiko ug netizen nga ang maong ganti maoy hinungdan nga naglain-lain ang giingong prime suspect sa maong krimen.
Tungod sa maong hitabo nimugna kini og kalibog sa uban nga matod pa nalawgaw na hinuon ang imbestigasyon.
Sa higayon nga makapagawas na og resolusyon ang Piskaliya i-release na gilayon sa kagamhanan sa dakbayan ang reward money ngadto sa hingtungdan nga nagsilbing yawe nga mailhan ang responsable sa pagpatay ni Silawan niadtong Marso 10 kansang panit sa nawong gilangkat ug dili na huwaton pa ang hukom sa korte kon makonbikto ba ang suspek sanglit sayod ang mayor nga mataod-taoran pa ang maong proseso.
Samtang ang City Police Office aduna nay mga tawo nga posible nga marekomendar sa kagamhanan nga angayang makadawat sa reward money.
“Pwera na lang ug wala nasay... basin naa nasay motumaw (nga laing suspek) ato lang tan-awon og unsa na unya... i-refer man ni nako sa city attorney og unsay stand,” tipik sa pamahayag ni Radaza.
Sa susamang kalambuan, makig-istorya si Radaza ngadto sa inahan ni Christine Lee nga si Lourdes Pardillo.
Si Lourdes dili kumbinsido sa kaso nga gipasaka sa kapulisan batok sa ikaduhang dinakpan nga si Llenes human nagdumili siya sa pagpirma sa affidavit of complaint sa kapulisan ubos sa kondisyon nga i-apil kadtong 18 anyos nga ex-boyfriend ni Christine nga unang nadakpan sa NBI ingon man ang pagpasaka sa kasong rape.
Apan unang nang mipasabot si P/Brig. Gen. Debold Sinas nga dili nila malakip sa maong kaso kadtong batan-ong dinakpan kay wa silay nakitang ebidensiya nga naglambigit kaniya sa kamatayon ni Silawan ug way pagpanglugos nga nahitabo base sa gihimong pag-autopsy sa lawas sa gipatay. “Ang ato lang maminaw sila both sides,” dugang pa ni Radaza. (GCM)