MAAYO ang panghunahuna sa self-confessed killer ni Christine Lee Silawan nga si Renato Llenes atol sa gihimong psychological test ni Dr. Rene Obra, ang hepe sa Center for Behavioral Sciences sa Vicente Sotto Memorial Medical Center (VSMMC).
Gipaubos nila sa duha ka oras nga interview si Llenes isip kabahin sa ilang paghiling sa pangutok niini.
Matod ni Obra, nakahatag og blow by blow account ang prime suspect lakip na sa iyang paghimo sa mini nga Facebook account niini sama sa CJ Diaz nga maoy iyang gigamit sa pagpakig-chat kang Silawan,
hangtod sa ilang panagkita sa simbahan sa Barangay Pajac, siyudad sa Lapu-Lapu diin didto nagsugod ang krimen.
Nitug-an matod pa kini kaniya nga sukad pa 13 anyos si Llenes nakagamit na siya og ilegal nga drugas sama sa pag hingus sa rugby.
Pag-edad nag 18 nagsugod na siyag hit-hit og shabu hangtod sa naabot siya og 39 anyos namaligya na siya niini.
Sa wala pa sila magkita ni Christine nigamit pa siya og shabu nianang buntag sa Marso 10 ug wala na siya masayod sa iyang gibuhat sa dihang nagkaaway na sila sa dalagita hangtod nga iya kining napatay gamit ang gunting.
Ang nakapakurat ni Obra sa dihang misaysay kini nga nakonsensya siya sa iyang gihimo ug tungod niini iyang giangkon sa mga pulis ang tanan.
Sa dihang pagmatuod nga si Llenes ug si CJ Diaz usa ra, nagpatabang siya, matod pa, sa kalag ni Christine Silawan nga maabli niini ang account ni Diaz.
Tungod sa mga pamahayag ni Llenes wala siyay nakitang sinyales nga aduna kini sakit sa iyang pangisip apan dili nila mahibaw-an kung namakak kini sa iyang gipangtabi ngadto kaniya. (S)