SECTIONS
Monday, July 22, 2019
SUPERBALITA CEBU

Editoryal: Wa kahay nagsulsol?

Editorial cartoon by Ariel Itumay

SA MIAGING semana pa unta pasakaan og kasong murder si Renato Llenes, suspek sa brutal nga pagpatay kang Christine Lee Silawan niadtong Marso 10 sa gabii. Andam na ang tanang mga dokumento ug mga ebidensya alang sa pagduso sa sumbong ngadto sa Lapu-Lapu City Prosecutor’s Office. Apan tungod sa wa pagpirma ni Lourdes Silawan sa usa ka affidavit, giuswag na lang sa Lapu-Lapu City Police Office ang pagsang-at sa kaso.

Niabot na lang ang Lunes, wa gihapoy kahigayunan nga maduso ang kaso batok kang Llenes. Busa kagahapon, bisan way ginikanan nga nipirma sa affidavit, gisang-at nila ni Police Col. Limuel Obon ang kasong murder batok kang Llenes.

Nahibung ang kapulisan kon nganong nagdumili si Lourdes sa pagpirma sa affidavit nga unta, ang tanang mga ebidensya, nagtudlo man sa suspek.

Gipakita na ngadto sa mga Silawan ang unang mga ebidensya nga nakuha sa LCPO investigators. Apan sa gihapon, niinsiter si Lourdes nga mopirma lang siya sa affidavit kon ilakip ang 18-anyos sa kihang murder ug pasakaan usab og kasong rape.

Si Police Regional Director Debold Sinas wa mouyon sa mga kondisyon ni Lourdes tungod kay (1) way ebidensya nga nagtumbok sa 18-anyos nga nalambigit siya sa krimen; (2) si Llenes niingon nga siya rang usa ang nibuhat sa krimen; (3) nga nitakdo usab ang resulta sa autopsy sa PNP Crime Lab sa pamahayag ni Llenes nga wa niya lugosa ang dalaga human niya masuta nga patay na.

Bisan pa sa pagkombinser sa kapulisan ug pagpakita og dugang mga ebidensya, wa gihapon mausab ang baruganan sa mga Silawan. Nganong ipaapil man sa mga Silawan pagkiha ang 18-anyos nga ang tanan nga mga ebidensya nga gipakita sa kapulisan nagpalingkawas man kaniya? Ning ilang baruganan karon, di malikayan nga dudahan nga dunay nagsulsol o nagdiktar kanila. Kon kinsa man, anam-anam na kining molutaw sa umaabot nga mga adlaw. Bisan unsaon pa pagtabon sa tinuod, sa madugay o sa madali, molutaw ra ang kamatuoran.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph